Дуковски: Пресудата од 12 години е донесена под огромен притисок од јавноста

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Дуковски: Пресудата од 12 години е донесена под огромен притисок од јавноста

07 октомври 2025

• од Станча Јаќимовски

Адвокатот Сашко Дуковски, бранител на осудениот Васил Јованов, изјави дека пресудата со која неговиот клиент доби 12 години затвор за сообраќајната несреќа во која загина Фросина Кулакова е донесена под силен притисок од јавноста. Според него, случајот претставува „лов на вештерки“, а казната е несразмерно висока во однос на слични случаи од судската практика.

„Сметам дека се сака да се оди на лов на вештерки и ако некогаш во историјата на македонското право е изречена ваква казна. Пресудата од 12 години тврдам дека е донесена под огромен притисок од јавноста. Тука важеше начелото ‘око за око, заб за заб’“, изјави Дуковски по денешната јавна седница пред Апелациониот суд Скопје.

Признанието и каењето

Дуковски посочи дека судот сега ја проверува доброволноста и искреноста на признанието на вина на Јованов. Тој нагласи дека каењето е покажано повеќепати и дека тоа било потврдено и со вештачење.

„Не може четири пати да се каете. Изведовме доказ – видео веднаш по несреќата – каде што тој искрено вели ‘леле што сторив, греота за девојчето’. Тоа ли не е искрено? И на судењето го кажа тоа, и пред судијата на претходна постапка, и во вештачењето. Не може да го измамите вештакот Маркециќ, кој е ангажиран од Обвинителството долги години и кој тврди дека каењето е сериозно и лично“, рече адвокатот.

„Нема бенефит од признанието“

Дуковски потсети дека признанието на вина треба да придонесе за пократка постапка и олеснета казна, но дека во случајот на Јованов тоа не било направено.

„Целта на признанието е да се избегнат долги и скапи судења, но и обвинетиот да добие некаков бенефит. Каков бенефит има со 12 години затвор?“, праша тој, додавајќи дека постоеле случаи со потешки последици и повеќе прекршоци кои завршиле со казни од осум години.

„Јавноста му пресуди на Васил Јованов. Јас не барам да му се даде орден, но барам разумна казна во рамки на досегашната судска пракса. Сообраќајки имало и ќе има“, истакна Дуковски.

Случајот Јованов

Денеска пред Апелациониот суд во Скопје се одржа јавна седница по жалбите на пресудата на Основниот кривичен суд Скопје од 13 мај годинава. Со таа пресуда, дваесетгодишниот Васил Јованов беше осуден на 12 години затвор за кривичното дело „тешки дела против безбедноста на луѓето и имотот во сообраќајот“, откако призна вина за прегазувањето на 22-годишната Фросина Кулакова од Неготино.

Трагичниот настан се случи на 29 јануари оваа година на булеварот „Партизански одреди“ во близина на Универзалната сала во Скопје. Според обвинението, Јованов возел пијан, без возачка дозвола и поминал на црвено светло кога ја удрил Кулакова на пешачки премин.