Двојниот убиец од Прилеп имал дозвола за оружје и криминално минато

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Двојниот убиец од Прилеп имал дозвола за оружје и криминално минато

14 јули 2025

• од Станча Јаќимовски

Прилепчанецот Петар Ѓ. (62), кој пред два дена изврши двојно убиство, а потоа и самоубиство по вооружен судир со полицијата, бил сопственик на легално поседувано оружје. Трагичниот настан се случи на улицата „Стеван Апостолоски“ во Прилеп, каде животите ги загубија 43-годишниот Панчо Ч. и неговиот 13-годишен син Милан Ч.

Според информациите од истрагата, Петар Ѓ. ги повикал жртвите во својот дом, каде ги застрелал. Како мотив за убиството се наведуваат семејни недоразбирања и нерасчистени имотно-правни односи. По убиството, тој отворил оган и кон полициските службеници и фрлил рачна бомба, пред да си го одземе животот.

Од ОВР Прилеп информираат дека Петар Ѓ. во минатото веќе бил пријавен за употреба на огнено оружје. Во 2002 година, против него била поднесена кривична пријава за предизвикување општа опасност, откако пукал во кафеана. Сепак, ова дело е веќе застарено, а во изминатите години не постоеле други активни пријави или поплаки против него.

Оружјето со кое било извршено убиството, според податоците, било добиено по основ на наследство. Дозволата за негово поседување била издадена во 2012 година и обновена во 2022 година.

При увидот на местото на настанот, во присуство на јавен обвинител, биле пронајдени чаури, траги од проектили, една рачна бомба М93 и два пиштоли – еден со калибар од 9 мм и друг со 7,65 мм. Потеклото на бомбата сè уште не е утврдено.

Од полицијата истакнуваат дека првата пријава за инцидентот била примена нешто по 21:20 часот. До тој момент, не постоела никаква претходна пријава за закани или сомнително однесување од страна на Петар Ѓ.

Жртвите, татко и син, денеска беа погребани на Старите градски гробишта во Прилеп, во присуство на роднини, пријатели и сограѓани, кои во тишина и тага се простија од нив. Трагедијата го потресе целото градско население и отвори сериозни прашања за контролата и надзорот на легалното оружје во земјата.