Филипче: 2026 година ќе биде уште потешка – следи сериозна криза и пораст на сиромаштијата

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Филипче: 2026 година ќе биде уште потешка – следи сериозна криза и пораст на сиромаштијата

27 декември 2025

• од Станча Јаќимовски

Претседателот на СДСМ, Венко Филипче, предупреди дека 2026 година ќе биде исклучително тешка за граѓаните, со сериозна економска криза и значително зголемување на сиромаштијата.

На прес-конференција со новинарите, Филипче истакна дека иако тековната година била тешка, следната ќе донесе уште поголеми економски предизвици. Според него, државата ќе се задолжи со најмалку дополнителни две милијарди евра, кои нема да се користат за капитални инвестиции, туку за тековни трошоци.

„Вкупниот износ за капитални инвестиции е намален во буџетот за 2026 година. Имаме сериозни проблеми со наплатата и реализацијата на приходите и ќе се соочиме со недостиг од околу 600 милиони евра“, изјави Филипче.

Тој предупреди дека инфлацијата ќе биде тешко контролирана, а со најавеното зголемување на цената на електричната енергија ќе растат и цените на основните прехранбени производи.

„Ако проектираниот раст на БДП е 3,7–3,8 проценти, а две третини од него се лична потрошувачка, тоа значи дека граѓаните ќе трошат повеќе за истото или за помалку. Странските инвестиции стагнираат и прашање е колку од нив ќе ја напуштат земјата“, нагласи тој.

Филипче додаде дека реализацијата на капиталните инвестиции паднала под 50 проценти, додека во периодот кога СДСМ била на власт изнесувала 80–90 проценти. „Нема ништо што ќе ја зголеми продуктивноста во државата“, рече тој.

Обвинувања за организиран напад врз СДСМ

Претседателот на СДСМ ја обвини владејачката структура дека се обидува да ја уништи партијата одвнатре, тврдејќи дека нападите се дел од организиран и финансиран проект на ВМРО-ДПМНЕ.

„Токму во моментот кога почнавме да откриваме коруптивни договори, ВМРО-ДПМНЕ активира организирана акција за разнебитување на СДСМ“, рече Филипче, додавајќи дека дел од поранешните функционери кои заминале во ЗНАМ сега се особено активни и гласни на социјалните мрежи.

Критики за моделот на владеење и односите со Србија

Филипче посочи и на, како што рече, директната поврзаност на актуелната власт со владејачките структури во Србија.

„Соработката со владата на Александар Вучиќ е очигледна. Премиерот Христијан Мицкоски го имитира Вучиќ – и во однесувањето, и во изјавите, и во концептот на политика“, нагласи тој.

Според Филипче, српскиот модел на владеење се пренесува и кај нас, каде „еден човек ја претставува целата политика, а останатите само ги спроведуваат неговите наредби“.

Тој предупреди дека ваквиот пристап води кон намерна изолација од Европската Унија, која, како што рече, служи како алиби за прикривање на криминалот и корупцијата. „Јасно е дека барањата кон ЕУ се невозможни, што веќе го потврдија и европските лидери“, истакна Филипче.

Иницијатива пред Уставниот суд

На крајот, од СДСМ најавија дека ќе поднесат иницијатива до Уставниот суд поради, како што наведоа, нарушување на уставно-правниот поредок. Причина за тоа е вчерашното усвојување на „Резолуцијата за осуда на манипулациите на опозицијата и потврда на политиките против илегалната миграција“, предложена од пратеничката група на ВМРО-ДПМНЕ.