Филипче категоричен: СДСМ нема да биде алиби за предвремени избори

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Филипче категоричен: СДСМ нема да биде алиби за предвремени избори

08 јануари 2026

• од Станча Јаќимовски

Претседателот на СДСМ, Венко Филипче, денеска остро реагираше на повиците на лидерот на ВМРО-ДПМНЕ, Христијан Мицкоски, за средба и разговори околу техничката влада, оценувајќи дека станува збор за однапред подготвено сценарио со цел распишување предвремени парламентарни избори.

„Средба со криминалци нема да има. Нема средба за техничката влада. Мицкоски е во тесно, му се брза и бара алиби за предвремени избори“, изјави Филипче на денешната прес-конференција.

Според него, сценариото е смислено уште минатата година, а СДСМ за него предупредувал јавно повеќе од два месеци. Филипче тврди дека власта нема средства во буџетот и дека преку предвремени избори и договори за мигранти се обидува да обезбеди финансиски средства.

„Предвремени избори, па мигранти за пари. Се брза да се превезуваат мигранти, да се земе кредит од 6 милијарди евра, плус 20.000 фунти по мигрант, како што пренесоа британските медиуми“, нагласи Филипче.

Тој порача дека СДСМ нема да учествува во, како што рече, однапред испланирано сценарио на тендер коалицијата ВМРО–ЗНАМ.

„Нека си ги распишат изборите сами кога веќе ги имаат испланирано. СДСМ нема да биде покритие за ова сценарио“, рече Филипче.

Во своето обраќање, лидерот на СДСМ остро ја критикуваше и работата на актуелната власт, обвинувајќи ја за целосна узурпација на институциите.

„Техничката влада мора да остане, затоа што власта ги стави канџите во правосудството, презеде целосна контрола врз обвинителството, носи измени на Кривичниот законик спротивно на препораките на Европската Унија и донесе закон за целосна партизација на полицијата“, истакна Филипче.

Тој најави дека во текот на утрешниот ден СДСМ ќе организира брифинг на кој, како што рече, детално ќе ги објасни законските измени и состојбите во правосудството.

Филипче посочи и на меѓународниот контекст, наведувајќи дека акциите на Соединетите Американски Држави и Законот за Западен Балкан, насочен кон борба против корупцијата и криминалот, дополнително ги забрзале процесите.

„Очигледно е дека се разоткриени пред целиот свет. Постојат најави за црни листи и санкции за политичари од регионот“, рече Филипче.

Тој го оцени како лицемерие повикот за средба од страна на Мицкоски, потсетувајќи дека претходно бил цел на континуирани напади, навреди и лажни обвинувања.

„И сега средба? Дали мислат дека и јас и СДСМ сме наивни? Средба нема. Техничката влада останува, а за сè друго – има само одговорност“, порача Филипче.