Филипче подготвен да го поддржи внесувањето на Бугарите во Уставот за да почнат преговорите со ЕУ

Лидерот на СДСМ, Венко Филипче, изјави дека е подготвен да преземе целосна одговорност и политички ризик за да се овозможат уставните измени и да се отворат преговарачките поглавја со Европската Унија. Изјавата ја даде денеска од Брисел, каде учествуваше на конференција организирана од Програмата „Вили Брант“ во рамки на Прогресивната алијанса на социјалистите и демократите (СД).

„Стојам целосно на располагање и подготвен сум да го понесам целиот товар – дури и по цена на мојата политичка кариера – доколку Владата смета дека тоа може да придонесе кон напредок во процесот на уставните измени и отворањето на преговарачките поглавја со ЕУ“, рече Филипче.

Тој нагласи дека времето игра значајна улога во европските интеграции, посочувајќи дека како што поминува времето, а соседните земји напредуваат, на С: Македонија ѝ станува сè потешко да го фати истиот чекор.

„СДСМ ќе даде поддршка на секој владин план кој има за цел да ја подобри нашата преговарачка позиција со ЕУ, без оглед на политичката цена. За жал, гледаме дека ова ветување на Владата веројатно ќе остане неисполнето“, изјави тој.

Филипче потенцираше дека СДСМ секогаш ќе биде на страната на решенија што носат напредок и подобар квалитет на живот за граѓаните. Според него, вистинските резултати можат да се постигнат само преку силни институции, владеење на правото, подобрување на животниот стандард и искрена борба против корупцијата.

„Ад хок решенијата се краткотрајни. Само преку процесот на евроинтеграција можеме да обезбедиме долгорочен развој – во правосудството, социјалната заштита, образованието и здравството. Тоа се клучните приоритети што граѓаните ги очекуваат“, додаде Филипче.

Со ваквите ставови, лидерот на СДСМ ја потврдува подготвеноста на партијата да ги поддржи сите процеси што водат кон членство во ЕУ, ставајќи го интересот на државата и граѓаните пред партиските и личните интереси.