Филипче: Владата да одговори дали е спремна да разговара за примање мигранти во нашата земја

Претседателот на СДСМ, Венко Филипче, на денешната прес-конференција упати директно прашање до Владата, барајќи одговор дали е подготвена да разговара со Велика Британија за можноста за прифаќање мигранти во Северна Македонија. Повикот доаѓа по објавени информации во британските медиуми дека се бараат партнери од Западен Балкан за сместување мигранти, по одбивањето на Албанија да склучи таков договор.

„На BBC News, непосредно по Самитот, се појави информација дека откако Албанија го одбила договорот со Велика Британија за примање мигранти, лидерите од Косово, Северна Македонија и пошироко од Западен Балкан генерално не се согласуваат со идејата за кампови, но се отворени за дијалог. Затоа прашувам јавно: дали нашата Влада е навистина спремна да разговара со Велика Британија за сместување мигранти во нашата земја?“ – изјави Филипче.

Во своето обраќање, Филипче подвлече дека СДСМ цврсто го поддржува Договорот за стратешка соработка со Обединетото Кралство. Потсети дека и во минатото, владите предводени од СДСМ имаат потпишано слични договори со Велика Британија, која тој ја оцени како значаен и доверлив партнер на Северна Македонија.

„Апсолутно го поддржуваме договорот. Велика Британија е сериозен сојузник на нашата земја, и тоа се покажало низ децении – и во време на кризи и во сите важни процеси за напредок. Токму затоа, кога договорот ќе дојде во Собранието на ратификација, нашите пратеници ќе гласаат 'за'“, рече претседателот на СДСМ.

Со оваа изјава, Филипче отвори значајно прашање во јавниот дискурс за евентуалното вклучување на Северна Македонија во поширокиот план на Велика Британија за справување со мигрантската криза, нагласувајќи ја потребата од транспарентна и јасна позиција на Владата пред јавноста.