Филипче: Законот за Кочани беше неопходен за помош на настраданите семејства

Претседателот на СДСМ, Венко Филипче, денеска на прес-конференција остро реагираше на одбивањето на предлог-законот за помош на семејствата погодени од трагедијата во Кочани, од страна на пратениците на ВМРО-ДПМНЕ. Тој истакна дека законот претставувал реална потреба, ослободен од политизација, наменет исклучиво за поддршка на семејствата што изгубија блиски или имаат повредени во трагичниот настан.

„Нашиот закон беше исклучиво насочен кон решавање на реалните секојдневни проблеми на луѓето погодени од трагедијата. Немаше политички ни партиски интерес, туку само потреба да им се помогне на семејствата. Одбивањето на ваков предлог покажува во каква состојба се наоѓа актуелната власт,“ изјави Филипче.

Тој додаде дека власта не ги примила, ниту ги ислушала родителите на настраданите деца, иако тие имаат многу да кажат и бараат поддршка која досега не ја добиле.

Филипче посочи и на зголемениот револт кај граѓаните, кој, според него, произлегува не само од трагедијата во Кочани, туку и од општата економска состојба во државата.

„Граѓаните се револтирани поради ниските плати, растечките трошоци за живот, неправдите што секојдневно ги доживуваат. Владата нема слух ниту за трагедијата во Кочани, во која загинаа 62 деца, ниту за економските маки на народот,“ нагласи тој.

На крајот, Филипче порача дека актуелната влада функционира во сè потесна „чаура“, отсечена од реалноста и проблемите на граѓаните, што само го зголемува нивниот гнев и недоверба.