Германската компанија Festo отвори една од најголемите инженерски бази во светот – во Софија

Германскиот светски лидер во автоматизацијата – компанијата Festo, официјално го отвори својот најголем развоен центар надвор од Германија, и тоа токму во Софија, Бугарија. Центарот, кој е дел од глобалната инженерска мрежа на компанијата, претставува една од најголемите технолошки инвестиции на Festo во светски рамки.

Според Калин Добрев, управител на „Фесто Бугарија“, ова е четврта голема експанзија на компанијата во последната година и половина. „Во 2023 година ја отворивме нашата лабораторија во Интер Експо Центарот. Во 2024 ја проширивме нашата канцеларија во Габрово, како и електронското производство во Софија. Денес го славиме проширувањето на Техничкиот инженерски центар, најголемиот надвор од Германија“, истакна тој на специјалното отворање.

Министерот за економија и индустрија на Бугарија, Петар Дилов, ја поздрави инвестицијата и истакна дека „она што се случува денес е признание дека вложувањата во таленти, развојни центри и иновации ја трансформираат Бугарија во сè позначаен технолошки хаб во регионот“.

Растечки центар со глобално влијание

Инженерскиот развоен центар на Festo во Софија започна со работа во 2019 година со само 50 вработени. До 2020 тој број порасна на 80, а во 2022 веќе броеше 110 вработени. Денес, по најновата експанзија, таму работат над 300 инженери и стручњаци, а работниот простор се зголеми на 2100 квадратни метри.

Во центарот се развива висококвалитетна технолошка продукција која се користи во индустрии ширум светот. Тимовите работат на тестирање и развој на производи во области како што се електрична автоматизација, пневматски системи, контроли, биотехнологија и електромагнетна компатибилност.

Иако точниот износ на инвестицијата не е јавно објавен, според медиумите, станува збор за инвестиција од неколку милиони евра. За потсетување, во 2023 година Festo инвестираше околу 20 милиони евра во нови објекти и развој во Бугарија.

Силни германско-бугарски врски

На отворањето присуствуваше и германската амбасадорка во Бугарија, Ирена Планк, која изјави: „Германија е најголем трговски партнер на Бугарија. Овие инвестиции се доказ за силната индустриска врска и иновациска моќ што ја градиме заедно.“

И покрај тоа што денес е глобален гигант, Festo останува семејна компанија. Во 2025 година таа одбележува 100-годишен јубилеј, со вкупен приход од 3,5 милијарди евра, од кои 8,8% се вложуваат во научно-истражувачки активности. Компанијата вработува околу 20.600 луѓе низ целиот свет, вклучувајќи ги и производството и развојот.