Им забраниле да му пишат казна на готвачот – баџанакот на Мицковски лично дошол да ургира?!
Анонимна група вработени во СВР Струмица објави писмо на социјалните мрежи во кое тврди дека на 2 март 2025 година, во раните утрински часови, сообраќајна патрола сопрела возач под дејство на алкохол кој, според нив, се обидел и да ги прегази. Возачот бил идентификуван како Славе Ристов, главен готвач во познатиот струмички ресторан „Шалом“, во сопственост на Јорданчо Јанев – Дано, баџанак на премиерот Христијан Мицковски.
Според писмото, полицајците утврдиле дека возачот имал 1,19 промили алкохол во крвта, по што тој наводно побарал од газдата Дано да интервенира кај началникот на СВР Струмица, Дејан Ефтимов – Деко. Анонимните вработени сведочат дека Дано и Ефтимов веднаш пристигнале на местото на инцидентот, каде што началникот наводно им се дерел на полицајците и ги обвинил за преземениот чекор против готвачот.
Најшокантен дел од тврдењата е дека, наместо да биде санкциониран возачот, полицајците кои постапиле по службена должност биле казнети. Според писмото, тие биле прераспределени од сообраќајна патрола на позиција на пријавница и задолжени за чување на куќа на поранешен функционер, што анонимните извори го толкуваат како казна.
„Срамот е голем – дно на дното“, стои во писмото, во кое се поставуваат прашања за тоа кој навистина управува со СВР Струмица – началникот или пак блискиот роднина на премиерот. Истовремено, се повикува внатрешната контрола на МВР да го истражи случајот и да ги испита наводите за злоупотреба на функција и прикривање на прекршок.
До објавувањето на оваа статија, МВР сè уште нема излезено со официјален став или потврда за случајот.
Настанот ја отвора вратата за сериозни прашања за владеењето на правото, заштитата на институциите од политички влијанија и безбедноста на граѓаните. Ако наводите се точни, станува збор за опасен преседан каде што службеници кои ја вршат својата работа се казнуваат, а законот се свиткува под тежината на врски и позиции.
Очекуваме реакција од надлежните органи и независна истрага која ќе ја разјасни вистината зад оваа контроверзна случка.