24 април 2025
• од Вардарски
Интерпелацијата за министерот за внатрешни работи Панче Тошковски, поднесена од пратеничката група на Левица, се очекува да биде ставена на дневен ред на пленарната седница што ќе се одржи на 29 април. Ова го најави претседателот на Собранието, Африм Гаши, на денешниот брифинг со новинарите.
– Сѐ уште тече рокот според Деловникот во кој министерот може да даде писмен одговор. Доколку одговорот не пристигне во наредните два до три дена, ќе мора да ја закажеме седницата најбрзо што може, односно на првата наредна пленарна седница. Очекуваме тоа да биде на 29 април, кога прва точка на дневен ред ќе биде интерпелацијата, изјави Гаши.
Интерпелацијата против Тошковски беше поднесена на 14 април од страна на пратеникот на Левица, Сашко Јанчев. Според него, причината за иницијативата е „грубо занемарување и несоодветно извршување на функцијата“ од страна на министерот, кој постапувал „нестручно, непрофесионално, несовесно и неодговорно“. Јанчев обвини за низа противзаконски дејствија, скандали и сомнителни кадровски поместувања во Министерството за внатрешни работи.
Освен оваа актуелна политичка тема, Гаши најави и новини во насока на дигитализацијата на Собранието. Тој информираше дека наскоро ќе биде организирана презентација на две нови софтверски алатки кои ќе го унапредат процесот на дигитализација во законодавниот дом.
– Тоа е процес што е еден од приоритетите на Собранието. Веќе имавме презентација на две нови софтверски алатки кои ќе им бидат од корист на сите граѓани, особено на новинарите. Кон средината на мај ќе организираме презентација на алатките, како и конференција за дигитализација, на која ќе учествуваат експерти од Естонија, САД и други земји, додаде претседателот на Собранието.
Со овие чекори, Собранието се обидува да покаже одговорност како во однос на надзорната функција врз извршната власт, така и во модернизација на сопственото работење.
Ненадминливи Понуди Дневно
4.8 (10276 рецензии)
Заштедете 152.00 ден

