Калајџиев: Шанса за реформи има, но само ако политиката ја тргне чизмата од судството

Во вториот дел од разговорот со Петрит Сарачини во шорткастот на ИМА „Што има ново?“, професорот Гордан Калајџиев остро го критикува начинот на кој се спроведуваат истрагите и укажува на длабоките системски проблеми во правосудството и институциите на државата. Поводот за разговорот беше трагедијата во кабарето „Пулс“ во Кочани, која, според него, уште еднаш го открива нефункционалниот систем и потребата од вистинско „ресетирање“.

Калајџиев реагираше на однесувањето на премиерот Мицкоски, кој јавно изнесе документи од истрагата, и потенцираше дека тоа е спротивно на Законот за кривична постапка. Според него, премиерот не треба да има пристап до докази во предистражна постапка, бидејќи тоа е исклучива надлежност на Обвинителството. „Ова само покажува дека немаме јасни стандарди и дека политичарите постојано се мешаат во надлежности што не се нивни“, нагласи тој.

Осврнувајќи се и на однесувањето на министерот за внатрешни работи, Панче Тошковски, Калајџиев истакна дека ресетирање на системот не може да се постигне со политичка реторика и дневнополитички поени. „Министерот држи лекции во Собрание, ги објавува и на Фејсбук, прави етнички разлики... тоа не е професионализам, туку токму спротивното – политизирање на институциите“, рече тој.

Клучот за вистинска промена, според Калајџиев, лежи во деполитизација на судството и поставување на професионалци со интегритет на раководни позиции во обвинителствата и судовите. Тој предупредува дека партиските кадри не можат да го донесат потребниот ресет, бидејќи се водени од сопствени интереси, вклучувајќи ги инвестициите и тендерите.

„Ако има некоја шанса за брзи резултати, тоа е само ако политиката ја тргне чизмата од судството. Само така може да се воспостави вистинска поделба на власта и систем на меѓусебна контрола – checks and balances“, заклучи професорот.

Целиот разговор може да се погледне во вториот дел од видео шорткастот на ИМА – „Што има ново?“, каде Калајџиев продлабочено зборува за правосудството, политиката и шансите за правна држава во Македонија.