Кривична пријава за тројца службени лица и угостител поради злоупотреба на службена положба во Крива Паланка

Одделението за внатрешни работи Крива Паланка поднесе кривични пријави до Основното јавно обвинителство Крива Паланка против тројца службеници во општинската администрација, како и против едно правно лице и неговиот сопственик, поради сомнение за извршени кривични дела „несовесно работење во службата“ и „узурпација на недвижности“.

Според податоците од полицијата, пријавите се поднесени против М.К. (41), Н.Ц. (54) и С.М. (38), сите од Крива Паланка. Н.Ц., вработен како самостоен референт за документациони работи и урбана опрема во Одделението за урбанизам, сообраќај и заштита на животната средина, на 19 декември 2024 година изготвил одобрение за поставување урбана опрема на улицата „Јане Сандански“, иако не биле исполнети законските услови.

Ова одобрение, и покрај неправилностите, било потпишано и од М.К., раководител на надлежниот сектор во Општината, како и од С.М., градоначалник на Крива Паланка. Со ова, според полицијата, му било овозможено на барателот – угостителски објект, да постави урбана опрема и да се стекне со противправна имотна корист во периодот од 9 декември 2024 до 9 декември 2025 година.

Покрај ова, кривична пријава е поднесена и против правното лице – угостителски објект и неговиот сопственик и управител М.М. (36), поради сомнение за сторено кривично дело „узурпација на недвижности“. М.М., како што се наведува во пријавата, во текот на 2024 година, како и во претходните години, поставувал маси, столови и други декоративни елементи на јавен простор пред деловниот објект на улица „Јане Сандански“, заземајќи 108,70 квадратни метри државно земјиште прогласено за имот во општа употреба.

Дополнително, на истиот узурпиран простор, без соодветно одобрение, поставил и настрешница со површина од 82 квадратни метри.

Случајот е во фаза на понатамошна постапка, а обвинителството треба да утврди дали има основ за покренување обвинение против пријавените.