Лукаревска: Семејствата во Кочани заслужуваат неселективна правда и транспарентни одговори за трагедијата

Пратеничката на СДСМ, Сања Лукаревска, остро реагираше на досегашниот тек на истрагата за трагедијата што се случи на 16 март во Кочани, укажувајќи на селективен и нетранспарентен пристап на надлежните институции. Таа своите ставови ги изнесе во емисијата „Топ Тема“ на Телма, каде што нагласи дека граѓаните и семејствата на настраданите имаат право на одговори и правда.

„Место истрага која носи јасни и транспарентни резултати, гледаме селективност и бомбастичен пристап. По ваква трагедија, никој нема право на оправдувања или селекција“, истакна Лукаревска.

Таа укажа на неусогласеностите и недоследностите во однесувањето на надлежните, посочувајќи дека додека поранешниот министер за економија се наоѓа во притвор, актуелниот министер тврди дека не е запознаен со надлежностите и нема поврзаност со издадените лиценци. Дополнително, според неа, јавноста не добила доволно информации ниту за полициските службеници кои биле задолжени за изготвување на ризик-планови, освен веста за нивна суспензија.

„Граѓаните заслужуваат вистина, а семејствата кои загубија блиски во трагедијата – правда. Овој процес мора да биде целосно транспарентен“, рече Лукаревска.

Во своето обраќање, таа се осврна и на иницијативата за формирање анкетна комисија, подвлекувајќи дека истата треба да започне со работа навремено, но никако не смее да биде замена за официјалната истрага.

„Анкетната комисија може да помогне во расветлување на околностите, но не смее да го замени процесот кој го водат МВР и Основното јавно обвинителство. Не смее да се користи како алатка за политичко поентирање“, предупреди Лукаревска.

Таа заврши со апел до надлежните институции да ја вратат довербата на граѓаните преку правична, целосна и неселективна истрага, потенцирајќи дека одговорноста мора да биде подеднаква за сите, без разлика на функцијата или политичката припадност.