Мециновиќ: За 72 часа ќе ги раскинеме договорите за рекламирање на казина и обложувалници на автобусите

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Мециновиќ: За 72 часа ќе ги раскинеме договорите за рекламирање на казина и обложувалници на автобусите

23 октомври 2025

• од Станча Јаќимовски

Кандидатот за градоначалник на Скопје од редовите на Левица, Амар Мециновиќ, на денешната прес-конференција изјави дека партијата бележи значителен раст на поддршката по првиот изборен круг, истакнувајќи дека левиот гласачки спектар се обединува околу нивната програма.

„Во изминатите неколку дена гледаме голем прилив на нови поддржувачи. Многу граѓани кои досега не гласале за Левица, сега ја гледаат како најсоодветна опција во вториот круг“, рече Мециновиќ, нагласувајќи дека Левица ќе ја преземе улогата на обединувачка сила на сите антивладини гласови во главниот град.

Соработка со независни листи и критика на владата

Мециновиќ откри дека Левица веќе е во разговори со неколку независни советнички листи за можност за соработка во Градскиот совет. Како пример го посочи движењето „Зелен Хуман Град“, со кое, според него, веќе имале заеднички ставови во претходниот мандат.

„Верувам дека и овојпат можеме да најдеме заеднички точки на интерес“, додаде кандидатот на Левица.

Тој ја оцени моменталната политичка ситуација како мобилизација против владината политика, обвинувајќи ја владата дека ја злоупотребува кризата со отпадот во Скопје. „Владата сакаше до крај да ги истроши скопјани, за потоа да прави театар со нивното здравје. Тоа е доказ дека имаме деструктивна власт“, истакна Мециновиќ.

Првите 72 часа: раскинување на штетни договори

Кандидатот за градоначалник најави дека веднаш по преземањето на функцијата, Левица ќе преземе конкретни мерки. Во првите 72 часа, партијата планира да ги раскине сите „штетни договори“ кои ја оптоваруваат градската администрација и јавните претпријатија. Особено го нагласи договорот со кој казина и обложувалници се рекламираат на автобусите.

„Тоа веќе не смее да биде така. Градската власт не смее да дозволува промовирање на корозивни општествени процеси на својот имот“, изјави Мециновиќ, додавајќи дека со овој потег ќе се подобри финансиската состојба на ЈСП. „Најатрактивниот рекламен простор во градот ќе биде вратен под стопанисување на јавното претпријатие, а не на приватни маркетинг агенции кои му оставаат само трошки“, нагласи тој.

Поддршка за младите и нови културни иницијативи

Во делот на културата, Мециновиќ најави две насоки на дејствување: финансиско зајакнување на Младинскиот културен центар (МКЦ) и основање на Скопски графити фестивал.

„Сакаме да му дадеме поголема финансиска поддршка на МКЦ. Дел од неговите простории може да се претворат во Скопско рок школо, простор каде младите ќе имаат пристап до инструменти и ќе можат да се усовршуваат“, изјави тој, додавајќи дека проектот ќе се реализира по примерот на слични европски иницијативи.

Покрај тоа, Мециновиќ најави и формирање на нов фестивал посветен на урбаната уметност. „Ќе поддржиме формирање на Скопски графити фестивал, по примерот на градови како Мостар. Секоја пролет ќе каниме уметници од регионот и од светот да создаваат мурали и графити, со што ќе го разубавиме Скопје и ќе му дадеме нов визуелен идентитет“, рече тој.

„Очекуваме зголемена поддршка во вториот круг“

На крајот, Мециновиќ најави дека во следните десет дена партијата ќе одржува тематски прес-конференции за дополнителни идеи и мерки за Скопје. „Нашите активисти се деноноќно на терен. Секојдневно комуницираме со граѓаните и ја артикулираме пораката на најдобар можен начин“, рече тој, изразувајќи уверување дека Левица ќе добие „значително зголемена поддршка“ во вториот изборен круг.