Минималната плата под прагот на сиромаштија: секое трето дете во Македонија живее во беда

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Минималната плата под прагот на сиромаштија: секое трето дете во Македонија живее во беда

30 декември 2025

• од Станча Јаќимовски

Податоците за сиромаштијата за 2024 година откриваат длабока економска и социјална криза, а не привремена последица од надворешни фактори, предупредува Левица.

Најновите податоци на Државниот завод за статистика за сиромаштијата во Македонија претставуваат аларм за состојбата во која се наоѓаат граѓаните. Со стапка на сиромаштија од 21,9 проценти, речиси 30 проценти сиромашни деца и загрижувачки 45,8 проценти сиромашни самохрани родители, станува јасно дека проблемот не е случаен ниту привремен, туку резултат на долгогодишен економски модел што систематски го потценува трудот.

Според Левица, овие бројки не се последица на „надворешни шокови“, туку директен производ на политики што ја префрлаат цената на таканаречените економски реформи врз најранливите категории на населението.

Вработени, а сиромашни

Фактот дека 7,9 проценти од вработените лица живеат под прагот на сиромаштија претставува, како што наведуваат од партијата, јасен доказ за неуспехот на неолибералната теза дека пазарот сам по себе ќе обезбеди достоинствен живот. Македонија, велат, станува економија во која се работи, но не се живее.

Минималната плата одамна ја изгубила својата социјална функција и наместо заштитен механизам, се претворила во алатка за одржување на евтина работна сила во корист на крупниот капитал.

Казна за семејствата со деца

Особено загрижувачка е состојбата кај семејствата со повеќе деца, каде што над половина од нив – 54,8 проценти – живеат во сиромаштија. Според Левица, ова е јасен показател дека државата практично ги казнува домаќинствата што ја репродуцираат работната сила, додека истовремено доделува субвенции, даночни олеснувања и поволности за профитите на големите компании.

„Социјалната држава е сведена на статистичка категорија, а не на реална економска политика“, се наведува во соопштението.

Минималецот како политички избор

Дебатата за минимална плата од 500 евра, според партијата, е одамна надмината. Ако прагот на сиромаштија за четиричлено семејство надминува 31.000 денари месечно, тогаш е и економски и морално неодбранливо минималната плата да биде под нивото што овозможува основна егзистенција и достоинствен живот.

Аргументот дека „економијата не може да издржи“ повисока минимална плата, од Левица го оценуваат како политички избор, а не економски факт, особено ако се земе предвид дека истата економија без проблем поднесува масовни субвенции за странски инвеститори, даночна регресија и толеранција кон сивата економија.

Повикување на системска промена

Од Левица порачуваат дека решението не лежи во козметички покачувања на платите, туку во темелна системска промена: воведување силна прогресивна даночна политика, јакнење на колективното договарање и изградба на активна социјална држава која реално ќе ги штити децата, самохраните родители и пензионерите.

„Без ваков пресврт, Македонија ќе продолжи да биде земја на евтин труд, сиромашни работници и изгубена иднина“, предупредуваат од партијата.