МВР поднесе кривична пријава за малтретирање во домови за стари лица

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

МВР поднесе кривична пријава за малтретирање во домови за стари лица – служеле храна со изминат рок

08 октомври 2025

• од Станча Јаќимовски

Министерството за внатрешни работи (МВР) поднесе кривична пријава до Основното јавно обвинителство – Скопје против две сопственички на приватни домови за стари лица, Н.Ј. (47) и Т.И. (58) од Скопје. Тие се осомничени за „продолжена злоупотреба на службената положба и овластување“ и „малтретирање во вршење на службата“, според член 353 и член 143 од Кривичниот законик.

Низа прекршувања и злоупотреби

Според соопштението од МВР, во координација со обвинителството, во изминатите два дена биле обезбедени докази дека осомничените, во својство на сопственички и одговорни лица на две приватни установи за социјална заштита во Скопје, грубо ги прекршиле законите и прописите за работа на вакви установи.

Во периодот од 2022 година до денес, тие сместувале повеќе лица од дозволениот капацитет, не воделе уредна евиденција за корисниците, немале стручна документација и не обезбедувале соодветни услови за хигиена и исхрана. Установите немале вработено доволен број стручни лица, а дел од вработените немале ниту потребна документација за ангажман.

За услугите што не ги исполнувале законските стандарди, од семејствата на згрижените наплаќале високи износи, со што месечно остварувале незаконска добивка од над 2,2 милиони денари.

Малтретирање и нехумани услови

При извршените претреси во двата домови — едниот на улица „Рудо“ во Бутел, а другиот на улица „Козара“ во Центар — било утврдено дека осомничените вршеле физичко и психичко насилство врз згрижените лица. Според наодите, корисниците биле изложувани на сурово, нечовечко и понижувачко однесување.

Во домот во Бутел биле сместени 27 лица, иако дозволата важела за само 21 лице, додека во објектот во Центар биле сместени 33 лица наспроти дозволените 17. Во двата дома немало доволен број квалификувани негуватели.

Дополнително, биле утврдени тешки прекршувања на човековото достоинство – машки и женски лица биле сместувани заедно во исти соби, дел од корисниците спиеле на троседи во дневна соба или по двајца во еден кревет, а на сите им се служела храна подготвена со производи со изминат рок на траење.

Инспекторите земале мостри од храната и материјалите што доаѓале во контакт со неа. Утврдено е и дека некои корисници биле заклучувани во посебни простории, а други примале лекови што не биле препишани од лекар.

Реакција на институциите

По наредба на јавниот обвинител, на сите згрижени лица им бил извршен лекарски преглед и детални анализи од стручни лица од Институтот за судска медицина. Двете установи се затворени, а со координација на надлежните органи, на корисниците им е обезбедено соодветно сместување во други социјални установи.

МВР најави дека ќе продолжи со контроли и санкции кон сите правни и физички лица кои вршат злоупотреби и не ги почитуваат законските стандарди во грижата за стари и изнемоштени лица.