Недостигаат 52 матични доктори во руралните подрачја – најавени измени за полесно отворање ординации

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Недостигаат 52 матични доктори во руралните подрачја – најавени измени за полесно отворање ординации

03 октомври 2025

• од Станча Јаќимовски

Во руралните средини низ Македонија моментално недостигаат 52 матични доктори. Од предвидените 96 места, активни се само 44 амбуланти, што значи помалку од 50 проценти исполнетост. Ова го соопшти генералниот директор на Фондот за здравствено осигурување, Сашо Клековски, на денешната прес-конференција.

Повици за предлози и измени на правилникот

Клековски најави дека со измени на постојниот правилник ќе се создадат поповолни услови за отворање рурални ординации, со цел да се охрабрат младите доктори да започнат со работа во овие средини. Фондот упати повик до сите матични лекари, младите доктори, но и до Здружението на приватни лекари, да испратат предлози за измените. Сугестиите може да се достават најдоцна до 1 ноември на е-пошта: ruralno@fzo.org.mk.

Посебна комисија ќе ги разгледува сите пристигнати предлози и оние кои се во согласност со законската рамка ќе бидат вградени во новиот правилник или ќе послужат како основа за измена на закони.

Пакет здравствени закони и финансиски олеснувања

Министерот за здравство на 6 октомври ќе го објави пакет од 12 закони за измена и дополнување, а Фондот паралелно ќе работи на олеснување на критериумите за рурални амбуланти и на зголемување на финансирањето.

– Ако се потребни други типови на промени, тие ќе мора да одат преку законски измени. Ние сме посветени на еднаква здравствена заштита за сите граѓани. Мора да дејствуваме сега, бидејќи за 10 до 15 години може да се соочиме со сериозна криза во покриеноста со матични лекари – истакна Клековски.

Проблеми и идни предизвици

Како најголеми проблеми се посочуваат малата капитација и ниските примања поради мал број осигуреници во руралните подрачја, како и обврската за формирање комплетен тим за работа. Дополнителна пречка е и тоа што сегашниот систем не овозможува лесна преносливост на ординациите – секоја амбуланта мора да згасне пред да се отвори нова, што го отежнува генерацискиот пренос при пензионирање на докторите.

Фондот разгледува можности за старт-ап поддршка и зголемени дотации независно од бројот на осигуреници, со цел да се олесни влезот на млади лекари во руралните амбуланти.

Европска перспектива

Клековски предупреди дека кризата со недостиг на матични лекари не е само македонски проблем. На консултација со Светската банка за Западен Балкан било истакнато дека низ цела Европа постојат огромни непокриени подрачја со примарна здравствена заштита, што резултира со продолжени листи на чекање за базични прегледи.

– Ако не реагираме навреме, може да се најдеме во ситуација каде што жителите ќе мораат да патуваат по 30 до 40 километри за да стигнат до доктор – предупреди директорот на Фондот.