Неспособност на дело: Косово го гради патот, С. Македонија уште прави планови!

Патот Тетово-Призрен е значаен инфраструктурен проект кој има за цел да го намали времето на патување меѓу двата града од сегашните три часа на помалку од еден час, што ќе придонесе за економскиот развој на регионот. Додека работите на косовската страна се во полн ек, во Северна Македонија сè уште се чека на административни процедури.

Министерот за инфраструктура на Косово, Либурн Алиу, истакна дека патот, со должина од околу 20 километри и вредност над 33 милиони евра, ќе ги поврзе Коридорот 8 во Северна Македонија и автопатот „Ибрахим Ругова“, кој ја поврзува Приштина со Тирана. Овој проект не само што ќе ги поврзе Призрен и Тетово, туку и ќе создаде поволни услови за економски развој во рамките на Националниот парк Шар. Дополнително, ќе овозможи поврзување на различни коридори меѓу двете земји. Алиу додаде дека проектот ќе продолжи со изготвување на дизајнот за тунелот на граничната точка, за кој двете земји издвоија буџет и постигнаа договори ратификувани во парламентите.

Од македонска страна, делегација предводена од министерот за транспорт и врски, Александар Николоски, и заменик-министерката Калтрина Зеколи-Шаќири, го посетија регионот. Николоски изјави дека овој пат ќе отвори многу можности за двете земји и информираше дека е потпишан тендерот за проектирање на македонскиот дел од патот, по што ќе следи проектирањето на заедничкиот тунел на граничната точка.

Заменик-министерката Зеколи-Шаќири нагласи дека овој проект се реализира благодарение на блиските односи со косовската влада и изрази задоволство што 2025 година започнува со конкретни проекти и работа на терен, и покрај климатските услови.

При посетата беше извршен увид на делницата „3“ со должина од 7 километри, чија вредност изнесува 8,3 милиони евра.