Несреќата во Кочани одзеде уште еден живот – ова е 60-тата жртва
Трагедијата што го потресе Кочани и целата држава доби уште едно болно продолжение. Почина Александар Карадаковски, управителот на дискотеката „Пулс“, кој беше сериозно повреден во пожарот што ја зафати дискотеката пред неколку недели. Тој беше префрлен на лекување во Литванија, каде што, за жал, утрово им подлегна на повредите.
Со неговата смрт, бројот на жртви од кобната ноќ во Кочани се искачи на 60.
Информацијата ја потврди за МИА д-р Игор Николов, координатор за повредените пациенти кои се лекуваат во странство. Според него, состојбата на Карадаковски била критична уште од моментот на приемот, а лекарските тимови во Литванија направиле сѐ што е во нивна моќ за да го стабилизираат.
За денеска во 13 часот е закажан состанок на Кризниот штаб, по кој се очекуваат повеќе информации и насоки за следните чекори, како и за поддршката што ќе им се обезбеди на повредените и нивните најблиски.
Пожарот што ја зафати дискотеката „Пулс“ додека била преполна со посетители ја остави заедницата во шок и болка. Истрагата за причините продолжува, а јавноста сѐ уште чека одговори и правда.
Граѓаните на Кочани и пошироко повторно се обединуваат во тагата, изразувајќи сочувство и солидарност со семејствата на настраданите. Смртта на Карадаковски само уште еднаш ја потсетува јавноста на длабоките последици од оваа трагедија, која засекогаш ќе го обележи градот.