НЕВЕРОЈАТНО: Украдено „Ауди“, двојно кршење на рампи и без дозвола – лудата ноќ на автопатот А1!
МВР соопшти дека на 4 април 2025 година во 23:15 часот, полициски службеници од Полициската станица за граничен надзор Михајлово го лишиле од слобода 26-годишниот М.Д. од Неготино, откако тој украл патничко возило марка „Ауди“ со битолски регистарски таблички.
Според соопштението на МВР, возилото било во сопственост на С.Д. (38) од Неготино и било паркирано во дворот на неговиот чичко во Неготино. М.Д. го одзел автомобилот и се упатил по автопатот А1 во насока кон Велес, каде на наплатната станица „Виничани“ ја скршил рампата. По кратко време, истиот возач ја скршил и втората рампа на истата наплатна станица, овојпат во спротивен правец – кон Неготино.
Полициските служби веднаш презеле мерки за лоцирање и запирање на возилото, по што М.Д. бил присилен да го запре. При проверка било утврдено дека тој управувал со возилото без да поседува возачка дозвола и под дејство на алкохол – со концентрација од 1.54 промили во крвта.
М.Д. е задржан во полициска станица, а за случајот е известен и јавен обвинител. По целосно документирање на настанот, против него ќе бидат поднесени соодветни пријави за сторените прекршоци и кривични дела согласно член 297-а и член 383 став 1 од Кривичниот законик.