Независниот синдикат на одбрана бара зголемување на платите и ревидирање на бодовниот систем

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Независниот синдикат на одбрана бара зголемување на платите и ревидирање на бодовниот систем

15 јануари 2026

• од Станча Јаќимовски

Независниот синдикат на одбрана бара зголемување на бодовите за основна плата за 20 проценти, ревидирање на системот на пресметка на платите со нивно врзување за трошоците за живот и инфлацијата, како и трајно решавање на статусот на професионалните војници до пензионирање. Ова денеска на прес-конференција го истакна полковник Марио Јурушиќ, претседател на Независен синдикат на одбрана.

Јурушиќ посочи дека во последните две години платите на воениот персонал и вработените во одбраната воопшто не биле зголемени. Со измените на Законот за служба во Армијата од 2024 година, бил изменет и системот на пресметка на платите. Претходно, платите биле врзани за минималната плата, па секое нејзино зголемување значело автоматско усогласување и во Министерството за одбрана.

„Со донесувањето на Законот, минималната плата беше заменета со минимални бодови и од тој момент сме целосно врзани за бодовниот систем. Бараме тој систем да биде врзан за трошоците за живот и инфлацијата, бидејќи од февруари 2024 година до денес, платите во Министерството за одбрана не се зголемени“, нагласи Јурушиќ.

Тој наведе дека минималната плата во државата во февруари 2024 година изнесувала 20.175 денари, додека во декември 2025 година достигнала 24.379 денари, што претставува разлика од 4.204 денари или раст од 20,84 проценти, според официјалните податоци на Државниот завод за статистика.

„Ако ги погледнеме платите на вработените во одбраната – професионални војници, цивилни лица, подофицери и офицери – ќе видиме дека тие се идентични во февруари 2024 и во декември 2025 година. Тоа значи дека реалниот животен стандард е намален. Станува збор за припадници на одбранбениот систем, столб на државата, и доколку не се следат економските трендови, се загрозува отпорноста на системот“, предупреди претседателот на Синдикатот.

Дополнително, Синдикатот бара решавање на статусот на професионалните војници по завршувањето на активната служба. Како што истакна Јурушиќ, тие се пензионираат порано поради бенифицираниот работен стаж, а по навршување 45 години им се нуди привремено вработување во други институции.

„Станува збор за луѓе во кои државата вложила многу – учествувале во меѓународни мисии, гаснеле пожари, спасувале животи и и денес обезбедуваат затвори и витални објекти. Треба да им се даде можност да останат во системот уште неколку години за да ја исполнат законската можност за пензионирање со 40 години пензиски стаж. Тие можат да придонесуваат во борбени и логистички единици, како и во обезбедување објекти, што претставува дополнителна сигурност“, рече Јурушиќ.

На новинарско прашање дали е остварена средба со министерот за одбрана, Јурушиќ одговори дека средбата е одржана, но дека од страна на министерот им било соопштено оти во наредните две години не се планира зголемување на платите во Министерството за одбрана.