Ново поскапување на горивата од полноќ – ова се новите цени!
Од полноќ, 20 мај 2025 година, граѓаните ќе се соочат со ново поскапување на горивата, согласно одлуката на Регулаторната комисија за енергетика, водни услуги и услуги за управување со комунален отпад (РКЕ). Малопродажните цени на нафтените деривати се зголемуваат во просек за 2,08% во однос на претходната одлука донесена на 16 мај 2025 година.
Причина за новото поскапување се повисоките референтни цени на нафтените деривати на светските берзи. Во однос на претходната пресметка, цените бележат следно зголемување:
- Бензините за 4,668%
- Дизелот за 1,642%
- Екстра лесното масло за 4,856%
- Мазутот за 0,580%
Дополнително, влијание има и курсот на денарот во однос на доларот, кој бележи зголемување од 0,1804%.
Во согласност со Законот за акцизи, РКЕ е должна да го вкалкулира и новиот зголемен износ на акцизата за екстра лесното масло (ЕЛ-1). Поради растот на цената на Gasoil 0,1% во првата половина на мај, се исполнети условите за дополнително зголемување на акцизата од 2,00 денари за литар.
Новите максимални малопродажни цени од 20 мај 2025 година се:
- ЕУРОСУПЕР БС-95: 75,50 денари/литар (зголемување од 2,00 ден)
- ЕУРОСУПЕР БС-98: 77,50 денари/литар (без промена)
- ЕУРОДИЗЕЛ (Д-Е V): 67,00 денари/литар (зголемување од 0,50 ден)
- Екстра лесно масло за домаќинство (ЕЛ-1): 69,00 денари/литар (зголемување од 4,00 ден)
- Мазут М-1 НС: 36,808 денари/килограм (зголемување од 0,279 ден)
РКЕ потсетува дека овие се максималните дозволени цени, а трговците имаат право да ги формираат своите цени и под нивото на утврдените максимуми.