ОБСЕ ја отвори мисијата за набљудување на локалните избори во Северна Македонија

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

ОБСЕ ја отвори мисијата за набљудување на локалните избори во Северна Македонија

05 септември 2025

• од Тодор Вангелов

Канцеларијата за демократски институции и човекови права на ОБСЕ (ОДИХР) денеска ја отвори својата мисија за набљудување на локалните избори закажани за 19 октомври во Северна Македонија, по покана на националните власти.

Мисијата е предводена од Матео Мекачи и ја сочинуваат 13 експерти со седиште во Скопје. Од 11 септември ќе бидат распоредени 24 долгорочни набљудувачи низ целата држава, а дополнително е побарано и пристигнување на 250 краткорочни набљудувачи непосредно пред денот на изборите.

Канцеларијата ќе ја оценува усогласеноста на изборниот процес со обврските на ОБСЕ и другите меѓународни стандарди за демократски избори, како и со домашното законодавство. Набљудувачите ќе ги следат сите клучни аспекти од изборите, меѓу кои регистрацијата на избирачите и кандидатите, активностите на кампањата во живо и онлајн, работата на изборната администрација и другите државни институции, примената на нови технологии во изборниот процес, законската рамка, финансирањето на партиите и кампањите, како и решавањето на изборни спорови. Ќе биде оценета и имплементацијата на претходните препораки. Сеопфатниот медиумски мониторинг претставува составен дел од оваа мисија.

Во текот на набљудувањето, мисијата ќе одржува средби со претставници на националните власти и политичките партии, како и со судството, граѓанското општество и медиумите.

На денот на изборите, кон мисијата ќе се приклучат и претставници на Конгресот на локални и регионални власти на Советот на Европа, како и на Европскиот парламент, за да го следат отворањето на избирачките места, гласањето, броењето на гласовите и сумирањето на резултатите.

Привремен извештај ќе биде објавен околу две недели пред изборите, со цел јавноста и медиумите да бидат навремено информирани за текот на набљудувањето. Финален извештај, со целосна оценка и препораки, ќе биде објавен два месеца по завршување на изборниот процес.

Мисијата за набљудување на избори на Канцеларијата за демократски институции и човекови права и Мисијата на ОБСЕ во Скопје работат одделно и независно, секоја во рамките на својот мандат.