Од 2 мај – преминувањето преку Шар Планина ќе се наплаќа
Од 2 мај 2025 година, влезот со моторни возила во Националниот парк Шар Планина ќе се наплаќа, објави државното јавно претпријатие „Национален парк Шар Планина“. Наплатата ќе се врши преку испраќање СМС порака или скенирање QR-код, каде што возачите треба да ја наведат категоријата на возилото и регистрацискиот број.
Цените се следни:
- мотоцикли и автомобили: 150 денари,
- ванови и минибуси со до 20 седишта: 250 денари,
- автобуси и товарни возила: 450 денари.
Таксата важи за сите посетители кои се движат по дозволените патишта низ паркот, додека жителите на локалните села, сопствениците на приватни имоти и правните лица регистрирани во рамките на Националниот парк ќе бидат ослободени од плаќање.
Од управата на паркот велат дека со оваа мерка се сака да се придонесе кон зачувување на природата и да се осигури дека посетителите кои не оставаат еколошки отпечаток нема да бидат дополнително оптоварени. „Со испраќањето на СМС порака за влез во паркот, директно придонесувате за заштита на ова уникатно природно богатство за идните генерации,“ се вели во нивното соопштение.
Плаќањето може да се изврши на телефонскиот број 144-555 или преку скенирање на QR-код на лицето место.