Од Владата велат дека „Усје“ не загадува: Не се утврдени неправилности при инспекциските надзори

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Од Владата велат дека „Усје“ не загадува: Не се утврдени неправилности при инспекциските надзори

03 јануари 2026

• од Станча Јаќимовски

На заедничка прес-конференција во Владата, портпаролката на Владата Марија Митева, директорката на Државниот инспекторат за животна средина Ивана Гиновска и директорот на Управата за животна средина Игор Никовски информираа за активностите во областа на заштитата на животната средина, квалитетот на воздухот и резултатите од спроведените инспекциски надзори во изминатиот период.

Директорката на Државниот инспекторат за животна средина, Ивана Гиновска, истакна дека во текот на 2025 година биле реализирани вкупно 1.700 инспекциски надзори, од кои 839 редовни, 532 вонредни и 329 контролни. При тие контроли биле утврдени 398 неправилности, за кои биле издадени исто толку решенија, а покренати се над 30 прекршочни и четири кривични постапки.

Гиновска појасни дека Инспекторатот работи согласно одобрен годишен план од Министерството за животна средина и просторно планирање, како и според акцискиот план за краткорочни мерки за чист воздух. Во рамки на овој план, од ноември 2025 до март 2026 година, Инспекторатот врши засилени надзори кај субјекти со А-интегрирани еколошки дозволи. Од 1 ноември досега биле спроведени над 55 инспекциски контроли, при што биле издадени 20 решенија и три забрани за работа.

Во однос на цементарницата „Титан Цементарница Усје“, директорката нагласи дека кај овој субјект биле извршени вкупно шест инспекциски надзори – два редовни и четири вонредни. Последните вонредни контроли биле спроведени на 18 ноември и 18 декември, во соработка со инспектори од Град Скопје и Општина Кисела Вода, при што, како што информираше, не биле утврдени никакви неправилности.

Дополнително, биле реализирани и ненајавени вонредни инспекции со инспектори од внатрешноста на државата, како и со службеници од Управата за животна средина, кои се и издавачи на еколошките дозволи. Спроведени биле и ненајавени мерења на емисиите во воздухот од страна на лабораторијата за животна средина при Министерството за животна средина и просторно планирање.

„Цементарница Усје секој месец доставува извештаи за емисиите во воздухот од сите емисиони точки, а двапати годишно и мерења од акредитирана независна лабораторија, што е обврска согласно дозволата што ја поседуваат“, изјави Гиновска.

Таа додаде дека инспекциските надзори продолжуваат континуирано и дека на секои 15 дена Државниот инспекторат за животна средина доставува извештај до работната група формирана при Министерството за животна средина. Во моментов, 120 правни субјекти во државата поседуваат А-интегрирани еколошки дозволи, од кои околу 40 се на територијата на Град Скопје.

На крајот, Гиновска потенцираше дека Инспекторатот не е орган на прогонот и нема надлежност да издава или одзема дозволи, ниту пак да врши вештачења или мерења на бучава, вода и воздух. Улогата на инспекциската служба, како што нагласи, е пред сè превентивна и репресивна во рамки на надзорот над спроведувањето на законските прописи.