Пензионер шетал на Водно, нашол граната... и си ја зел дома!
Во земја каде што речиси ништо веќе не нè изненадува, се појави настан што ќе ве остави и со подигната веѓа и со насмевка.
На 30 март во 14:11 часот, скопската полиција добила пријава каква што не се слуша секој ден. Седумдесет и едно годишниот З.Н. од Скопје, ден претходно – на 29 март околу 12:30 – шетајќи по падините на Водно, налетал на нешто што наликувало на граната. И наместо да повика надлежни органи на лице место, господинот – со смиреност што и Џејмс Бонд би му позавидел – одлучил да ја земе со себе!
Полицијата потврди дека станува збор за граната со калибар од 75 мм, останата од времето на Втората светска војна. Среќна околност е што експлозивната направа била безбедно преземена од надлежните служби и е подложена на понатамошна постапка.
Од МВР апелираат до сите граѓани – колку и да сте љубопитни или храбри, не допирајте непознати или сомнителни предмети, особено не експлозивни! Наместо тоа, веднаш известете ја полицијата.
Овој настан уште еднаш потврдува: животот во Македонија секогаш има сценарио што Холивуд би го посакал. А пензионерот? Па... тој веројатно си се вратил дома со идеја дека нашол „сувенир“ од историјата.