Петровска ќе поднесе претставка до Комисијата против дискриминација за изјавите на Димитриеска-Кочоска

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Петровска ќе поднесе претставка до Комисијата против дискриминација за изјавите на Димитриеска-Кочоска

28 февруари 2025

• од Вардарски

Пратеничката Славјанка Петровска најави дека ќе поднесе преставка до Комисија за спречување и заштита од дискриминација поради денешните изјави на министерката за финансии Гордана Димитриеска-Кочоска која и упати лични напади базирани на нејзината семејна состојба.

„Ова не е заради мене. Она што денеска се случи во јавноста не е заради Славјанка Петровска туку затоа што еднаш засекогаш мора да се стави стоп на ваквото однесување од страна на власта. И не е првпат премиерот и претставници на Владата да навредуваат, понижуваат и омаловажуваат пратеници на поставено прашање. Ако ние денеска зборуваме за парламентарна демократија тогаш секој треба да си го знае своето место“, рече Петровска во вечерашното гостување во емисијата „24 Анализа“ на Телевизија 24.

Пратеничката Петровска рече дека од собраниската говорница упатила прашање зошто пратениците на ВМРО-ДПМНЕ не го поддржале законот за намалување на патните трошоци, а на кое не добила одговор.

„Поставив многу јасно прашање кое слободата на говорот ми дава да го формулирам онака како што сметам. Во моето прашање имаше два клучни елементи, а тоа е дали некој со плата од над 100 илјади денари треба да ни кажува каков грашок треба да јадат граѓаните и колку млеко треба да се пие. Можеби е добро во иднина тие потрошувачки кошнички да не ги прават луѓе со големи примања, туку некои со реални примања“, рече Петровска.

Според неа, таа добила навреда, но, како што рече, не ја примила иако намерата била да биде омаловажена затоа што нема деца и семејство.

„Дали јас добив навреда, јас не ја примив навредата. Дали беше намерата да бидам навредена и омаловажена затоа што немам деца и немам семејство, апсолутно да. Реакциите кои следуваа на јавноста не само на СДСМ по ова е тоа што всушност го вознемири ВМРО-ДПМНЕ, затоа што видоа дека отиде работата предалеку“, нагласи Петровска.

Петровска, потсетувајќи на она што го кажа министерката Димитриеска-Кочоска како „Не можам да кажам почитувана. За да кажам почитувана треба да ја заслужите мојата почит“, рече дека само во диктатура е така, во демократија е обратно, министрите се тие кои ја бараат почитта од пратениците, без разлика од која партија доаѓаат.

За изјавата на министерката „врз основа на што вие во уста ги ставате мајките што имаат деца и како знаете вие едно повеќечлено семејство колку треба да троши. Јас сум мајка на два сина“, Петровска вели дека алудира на потценување и „обид да ме дискредитира, да ме дискриминира заради тоа што јас немам деца“.

„Тоа е моја лична состојба, мојот личен статус и тоа дали сум сама, дали имам семејство или имам деца е мое лично прашање. Зошто е тоа така знам јас и судбината“, додаде Петровска.

Таа додаде и дека во „нормална држава, во која постои одговорност и во која се знае редот, кој поставува прашања во парламентот и кој кого повикува на одговорност“, би очекувала дека досега ќе има оставка од министерката.

На денешната седница во Собранието, пратеничката од Социјалдемократскиот сојуз на Македонија (СДСМ) Славјанка Петровска поставувајќи прашања се осврна на неодамнешните изјави на министерката за финансии Гордана Димитриеска-Кочоска за цените на храната, како грашокот од конзерва и количината на млеко што треба да ја консумира едно семејство.

Димитриеска-Кочоска место да одговори ја нападна Петровска на лична основа за нејзината семејна состојба. Димитриеска-Кочоска налутено и порача на Петровска дека не може да и каже оти е почитувана бидејќи, како што рече, тоа треба прво да се заслужи.

Неколку часа по настапот во Парламентот и по бројните реакции од членови на СДСМ, други политички партии и од граѓани, со објава на Фејсбук се огласи министерката за финансии која рече дека никогаш немала намера да ја навреди пратеничката Славјанка Петровска, но оти почитта мора да се заслужи.

Според неа, дел од јавноста е манипулиран. Таа жали што нејзините зборови биле погрешно разбрани.