Приведен жител на Крива Паланка: Возел пијан, без дозвола и лажно се претставил како агент на АНБ
Полициски службеници од СВР Скопје привеле 31-годишен маж од Крива Паланка, кој рано утрово, околу 02:30 часот, управувал возило под дејство на алкохол и без возачка дозвола, а се претставил и лажно како вработен во Агенцијата за национална безбедност (АНБ).
Инцидентот се случил на булеварот „Србија“ во Скопје, каде лицето Б.Р. управувајќи патничко возило од марката „Хјундаи“ со скопски регистарски таблички, изгубил контрола и удрил во објект на бензинска пумпа.
При полициската интервенција било утврдено дека возачот нема положено за возачка дозвола, а алкотестот покажал присуство од високи 2,14 промили алкохол во крвта. Дополнително, при легитимирање, тој лажно се претставил како припадник на АНБ.
Случајот е целосно документиран, а против него ќе биде поднесена соодветна кривична пријава за „безобѕирно управување со моторно возило“ по член 297-а од Кривичниот законик.
Полицијата апелира до граѓаните да не управуваат возила под дејство на алкохол и потсетува дека лажно претставување како државен службеник претставува сериозно кривично дело.