Протести во Двориште: Жителите алармираат за институционална тортура, сиромаштија и нарушена приватност

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Протести во Двориште: Жителите алармираат за институционална тортура, сиромаштија и нарушена приватност

14 декември 2025

• од Станча Јаќимовски

Жителите на селото Двориште повторно излегоа на протест, јавно изразувајќи го својот револт поради, како што велат, насилничко и неправедно однесување од страна на граничната служба и други државни институции. Според нив, состојбата во селото е доведена до точка на целосна неодржливост, а секојдневниот живот е исполнет со страв, казни и егзистенцијална неизвесност.

Како што посочуваат демонстрантите, уште на 18 септември, пред околу три месеци, селото било буквално „окупирано“, со постојано присуство на граничната полиција, како да станува збор за криминална средина, иако, како што велат, станува збор за мирно и чесно население. Жителите тврдат дека 24 часа дневно се под надзор, што особено негативно се одразува врз децата, кои од страв одбиваат да излегуваат надвор.

Дополнително, граничната служба, според жителите, влегува во приватни имоти без соодветна најава и дозвола, поставува камери каде што ќе посака и директно ја нарушува приватноста на луѓето. Тие нагласуваат дека ниту едно министерство досега не излегло во пресрет на нивните барања, иако станува збор за рурална средина со нула проценти вработеност, каде населението преживува исклучиво од земјоделство и сопствени ресурси.

Жителите истакнуваат дека самите ги одржуваат локалните патишта, кои се во лоша состојба, а паралелно се соочуваат со високи казни од по 500 евра за користење приколки и земјоделски возила што не можат да се регистрираат. Како што објаснуваат, фабрички приколки не се соодветни за нивните терени, а нема ниту механизам преку кој нивните рачно изработени приколки би можеле легално да се регистрираат. Поради тоа, не можат ниту да ја пренесат својата земјоделска роба до нивите и плацевите.

Сериозен проблем претставува и недостигот од огревно дрво. Жителите тврдат дека им се одзема исправна дрвна маса, иако поседуваат целосна документација која докажува дека дрвата се од приватни парцели и легално обезбедени. Во еден од посериозните случаи, на лице со инвалидитет, кое се грижи за болна сопруга, му бил одземен тракторот со кој превезувал отпадни дрва од сопствен имот.

Дополнително, земјоделците се соочуваат и со проблемот на пласман на своите производи. Како што велат, компирот и другите земјоделски култури нема кој да ги откупи, бидејќи пазарот е преплавен со увоз, што дополнително ја влошува и онака тешката економска состојба во селото.

„Во јавноста сме прикажани како криминалци, а всушност сме луѓе кои се борат да преживеат“, порачаа демонстрантите, нагласувајќи дека селото, кое е едно од побројните во регионот, за кратко време може целосно да се испразни доколку институциите не реагираат.

Жителите на Двориште бараат итна правда, преиспитување на постапките на граничната служба и конкретни мерки за заштита на нивните основни човекови и егзистенцијални права.