С. Македонија со дефицит од 1,45 милијарди евра

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

С. Македонија со дефицит од 1,45 милијарди евра – извозот расте, но недоволно

18 јули 2025

• од Станча Јаќимовски

Македонската економија повторно се соочува со сериозни предизвици на надворешно-трговски план. Според најновите податоци на Државниот завод за статистика за периодот јануари – мај 2025 година, трговскиот дефицит на земјата изнесува 1,45 милијарди евра, и тоа во услови кога вкупниот извоз бележи раст од 3% во однос на истиот период лани.

Најзагрижувачки е падот на македонскиот извоз во Германија – најголемиот и најзначаен трговски партнер на државата. За првите пет месеци од годинава, извозот кон Германија се намалил за 9,5% и изнесува 1,24 милијарди евра. Овој пад претставува сериозен удар за македонската економија ако се има предвид дека речиси половина од вкупниот извоз на земјата завршува на германскиот пазар. Иако увозот од Германија исто така е намален (за 12%), аналитичарите предупредуваат дека ваквиот тренд е показател за слабеењето на конкурентноста и структурните проблеми во извозната понуда на Македонија.

Од друга страна, Велика Британија останува главен увозен партнер, со увоз вреден 532 милиони евра и трговски дефицит од 490 милиони евра, најмногу поради увозот од компанијата „Џонсон Мети“. Следува Грција со увоз од 409,6 милиони евра и извоз од 112 милиони евра, кој бележи раст од 18% во однос на истиот период лани.

Ситуацијата со Србија останува непроменета – голем трговски партнер, но и постојан извор на дефицит. За пет месеци, Србија извезла стоки вредни 313 милиони евра во Македонија (раст од 17%), додека извозот кон Србија не е доволен да го покрие тој увоз, со што дефицитот достигнува 150 милиони евра.

Кина, пак, е најголемата трговска главоболка на Македонија. Дефицитот со оваа азиска сила изнесува речиси 450 милиони евра. Увозот од Кина достигна 466,7 милиони евра (раст од 15%), додека извозот кон Кина изнесува само 19 милиони евра – пад од 14% споредено со минатата година. Овие бројки укажуваат на сериозна нерамнотежа и отсуство на соодветна стратегија за пласман на македонски производи на кинескиот пазар.

Турција и Бугарија исто така се меѓу државите со кои Македонија има значителен трговски дефицит. Со Турција, увозот изнесува 325 милиони евра (раст од 8%), додека извозот е во пад од 10%. Со Бугарија, увозот пораснал за 10% и изнесува 262 милиони евра, а извозот за 13% и изнесува 190 милиони евра.

Позитивен пример е Унгарија, која првпат влегува во топ десетте трговски партнери на Македонија. Со оваа земја Македонија има суфицит – извозот изнесува 155,6 милиони евра, а увозот 93 милиони евра.

Иако Косово ја загуби својата позиција меѓу најголемите трговски партнери, Полска ја искористи шансата и сега е во врвот, со македонски извоз од 55 милиони евра (раст од 19,5%) и увоз од 155 милиони евра.

И покрај порастот на извозот на пијалоци и тутун за импресивни 54%, факт е дека трговската размена продолжува да биде длабоко дефицитарна, особено со најголемите економии. Структурните проблеми остануваат, а потребата од нова индустриска и извозна стратегија станува сè поитна. Време е надлежните институции да понудат конкретни мерки, бидејќи „мечката веќе заигра пред нашата врата“.