Само 1% од младите веруваат дека Владата се грижи за нив

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Само 1% од младите веруваат дека Владата се грижи за нив

12 август 2025

• од Станча Јаќимовски

По повод 12 август – Светскиот ден на младите, невладината организација ХЕРА објави истражување кое алармира на сериозните системски предизвици со кои се соочуваат младите во државата. Податоците откриваат дека само 1% од младата популација смета дека Владата целосно се грижи за нив, додека мнозинството чувствуваат ограничени можности и несигурна иднина.

Главни проблеми: образование, вработување и институционална негрижа

ХЕРА посочува дека младите се соочуваат со неквалитетно образование, слаба институционална поддршка, корупција и висока невработеност. Според официјалните податоци, 23,7% од младите (15–29 години) се во NEET категорија – не се вработени, не студираат и не посетуваат обуки – што е значително над европскиот просек.

„Високата невработеност, недостатокот на младински пријателски здравствени услуги, недостигот на безбедни јавни простори и корупцијата ги принудуваат младите да бараат перспектива надвор од државата,“ велат од организацијата.

Недоверба во институциите и ниска политичка ангажираност

Истражувањето покажува дека повеќе од две третини од младите не се чувствуваат вклучени во процесите на одлучување, а 70% немаат интерес за политиката.
Половина од младите (51,4%) веруваат дека властите воопшто не се грижат за нив, а само 1,1% имаат спротивно мислење. Дури 74,4% не припаѓаат на ниту една организација, што укажува на слаб граѓански ангажман.

Од 80 општини, само 19 имаат формирано младински совет, а локални стратегии за млади постојат во само 7. Недостигот на јавни простори, културната изолација и отсуството на неформално образование се дополнителни бариери.

Ментално здравје и насилство – алармантни бројки

Состојбата со менталното здравје кај младите е загрижувачка: 64% од девојчињата на 15 години имаат психосоматски тегоби најмалку еднаш неделно, а 53% од истата возрасна група чувствуваат депресивно расположение. Насилството е во пораст, а потребата од програми за поддршка на менталното здравје станува итна.

Повик за реални политики и младинско учество

По повод Денот на младите, ХЕРА ги повика кандидатите за градоначалници во пресрет на локалните избори своите програми да ги подготват во директна консултација со младите.
Меѓу препораките се:

формирање функционални младински совети во сите општини,
обезбедување јавни простори за младински иницијативи и образовни центри,
воведување служби за ментално здравје,
активно вклучување на младите во изработка на локални стратегии.

„Заминувањето на младите нема да се реши со кампањи и повици за патриотизам и раѓања на деца, туку со конкретни, мерливи и долгорочни инвестиции во нивниот потенцијал. Локалната власт е првата линија на контакт и токму таму треба да започнат вистинските промени,“ истакнуваат од ХЕРА.

Организацијата апелира младите да се третираат не како маргинална група за отчет, туку како рамноправни партнери во процесите на одлучување и креирање на иднината.