СДСМ бара оставка: Дали Панче Тошковски е симбол на распадот на МВР?

Со остри критики и предупредувања за сериозен системски проблем во безбедносниот апарат, СДСМ денеска преку својата портпаролка Богданка Кузеска одржа прес-конференција на која директно го обвини министерот за внатрешни работи Панче Тошковски за, како што рече, хаосот и нефункционалноста на МВР.

„Со Панче Тошковски на чело на МВР, хаос се случува по македонските улици, безбедноста е загрозена, нема никакoв ред и поредок“, изјави Кузеска, посочувајќи дека Министерството не е способно да санкционира дури ни неправилно паркиран џип.

Повод за реакцијата на СДСМ е најновиот скандал во скопската населба Дебар Маало, каде двајца полициски службеници, дел од обезбедувањето на претседателката на државата, лажно тврделе дека луксузно „порше“ паркирано на тротоар е службено возило на државна институција. Според СДСМ, со тоа се обиделе да спречат пајак-служба да го подигне возилото, со што директно поттикнале неказнивост.

„Да не беше реакцијата на младите, и овој случај ќе беше заташкан. Но, по бурните реакции, МВР беше принудено да поведе дисциплински постапки“, изјави Кузеска.

Во обраќањето беа спомнати и други инциденти поврзани со обезбедувања на високи функционери од власта: оддавање државни тајни, попречување полициски акции, физички напади врз полициски службеници и заканувања со огнено оружје на јавни места.

„Ова не се изолирани инциденти – ова е системски распад на безбедносниот апарат! Полицајци кои треба да не чуваат – работат за интересите на криминалци, моќници и тајкуни“, порача Кузеска.

СДСМ бара итна одговорност и оставка од министерот Панче Тошковски, кој, според нив, е директно одговорен за состојбата во МВР и за, како што велат, поврзаноста на дел од безбедносниот апарат со криминални структури.

„Вака не може! Одговорност мора да има и таа мора да започне со најодговорниот – министерот Панче Тошковски“, заклучи Кузеска.