СДСМ: Колку чинат екскурзиите на Љутков во странство со цела свита?

Додека институциите на културата во Македонија преживуваат на работ на финансиски колапс, а вработените во нив се уште чекаат исплата на своите плати, министерот за култура Зоран Љутков заедно со голема партиска свита замина на луксузна „дипломатска“ екскурзија во Јапонија.

Со Љутков во делегацијата се најдоа и министерот за надворешни работи Тимчо Муцунски со сопругата, генералниот секретар на Владата, како и уште неколку „културни авторитети“, наводно во мисија на поддршка на ансамблот Танец и за „јакнење на културната соработка“.

Но, граѓаните заслужуваат одговори:

• Колку точно лица брои оваа луксузна делегација?
• Колку народни пари беа потрошени за патувањето во Осака, за авионски билети, сместување во хотели, дневници, протоколарни вечери, гардероба, подароци?
• Каков е конкретниот бенефит за Македонија од оваа „културна мисија“?

Ќе се вратат ли во земјава со нешто повеќе од албум со селфиња, објави на социјалните мрежи за „успешни средби“ и неколку празни фрази за „интеркултурен дијалог“?

Особено иронично е што во рамки на посетата е организирана и изложба посветена на големиот јапонски архитект Кензо Танге — визионерот што го проектираше обновеното Скопје по катастрофалниот земјотрес во 1963 година. Истото тоа Скопје кое токму ВМРО-ДПМНЕ, со истата оваа партиска структура, го изобличи со проектот „Скопје 2014“, прекривајќи го со стиропор, лажен барок и кич. Па, кој има образ денес да го слави Танге, кога неговото дело беше грубо погазено?

СДСМ смета дека граѓаните имаат право да знаат колку чинат овие паради и дали културата служи само како алиби за туристички луксуз на министрите и нивната свита. Јавноста бара транспарентност, отчет и одговорност.

Соопштение за јавност на СДСМ