СДСМ обвинува: Сѐ уште нема одговорност за полициските пропусти во трагедијата во Кочани

Социјалдемократскиот сојуз на Македонија (СДСМ) денеска остро реагираше на начинот на кој се води истрагата за трагедијата во Кочани, каде што животите ги загубија 61 лице, а околу 200 млади беа повредени. Според соопштението на партијата, проширувањето на истрагата е ограничено само на минатото, без да се зафати моментот на настанот и без да се истражи улогата на актуелните полициски функционери.

„Истрагата се уште нема одговор на клучните прашања: Кој е одговорен за пожарот што однесе толку многу животи? Кој ќе понесе одговорност за очигледните пропусти во безбедноста, за кои директно се надлежни МВР и БЈБ?“ прашуваат од СДСМ.

Според социјалдемократите, на денот на трагедијата – 16 март – одговорни биле актуелни функционери од ОВР Кочани, СВР Штип и БЈБ, кои имале директна должност да обезбедат безбедност и навремена реакција. „Ако навистина затаиле безбедносните механизми, како е можно ниту еден од тие функционери да не биде повикан на одговорност?“ стои во реакцијата.

СДСМ укажува дека полицијата била присутна на местото на трагедијата — во дискотеката во Кочани — каде, според нив, видела малолетници, пиротехника, непријавен настан и работа на клуб без лиценца, но не презела никакви мерки.

Дополнително, партијата потсетува дека Министерството за внатрешни работи (МВР) е надлежно и за издавање дозволи и контрола на употреба на пиротехника во затворен простор – еден од главните фактори за избувнување на пожарот.

„Министерот Тошковски, наместо да се занимава со политички изјави, треба да одговори зошто до денес нема никаква одговорност меѓу актуелните полициски раководители кои тој ден биле на должност“, велат од СДСМ.

Партијата ја повторува својата позиција – дека мора да има неселективна правда. „Никој не смее да биде заштитен. Истрагата мора да ги опфати сите, без разлика на позицијата или функцијата. Граѓаните заслужуваат одговори и правда за Кочани“, порачуваат од СДСМ.