Шукова: Институциите затаија со загадувањето на Крива Река, одговорност мора да има

Потпретседателката на СДСМ, Каја Шукова, во интервју, го коментираше инцидентот со загадувањето на Крива Река, истакнувајќи дека јавноста е загрижена поради неактивноста на институциите и побара одговорност во согласност со законите.

„Јавноста е многу револтирана од институциите, и тој тренд мора да застане, но тоа ќе се случи само кога институциите ќе реагираат навремено и ќе ја информираат јавноста на време. Ако тоа се направи, нема да имаме недоумици за тоа дали имало екоцид, колку било загадувањето и што всушност се случило“, нагласи Шукова.

Потпретседателката на СДСМ посочи дека е многу симптоматично што постојат различни анализи на загадувањето, вклучително и онаа која ја презентираше градоначалникот на Крива Паланка. Според неа, нивото на цијанид било поголемо за 14 пати, што го потврдува она што го кажа градоначалникот, а не податоците кои ги изнесе директорката на Инспекторатот за животна средина, која тврди дека загадувањето било само два пати поголемо од дозволеното.

„Директорката на инспекторатот излезе пред јавноста дури 21 ден по инцидентот и уште се заканува со кривична пријава кон градоначалникот, кој само ја информираше јавноста за можниот екоцид. Тоа е нормално. Но, тие информации треба да му бидат обезбедени и на градоначалникот и на јавноста“, додаде Шукова, истакнувајќи дека инцидентот со рудникот Тораница бил пријавен во 6:30 часот, додека инспекторите на терен излегле дури 10 часа подоцна, на 14.03.2025, во 16:20 часот.

„Очигледно е дека не е постапено како што треба. Според законот за инспекциски надзор на животната средина, во итни случаи како овој, инспекторите имале обврска веднаш да земат примероци. Зошто не го направиле тоа, ќе утврдат истражните органи“, рече Шукова.

Таа потсети дека не може да се префрла одговорноста за затајувањето на институциите на другите и истакна дека секој орган треба да ја извршува својата работа согласно законските прописи. „Не треба да ја префрлуваме одговорноста, мора да се работи во согласност со законите“, порача Шукова, упатувајќи апел за сериозно и навремено постапување од страна на сите институции за заштита на животната средина.

Оваа изјава на Шукова доаѓа во време кога јавноста и еколошките организации се загрижени за штетите што ги предизвика загадувањето на Крива Река и бараат одговорност за ненавременото реагирање на надлежните институции.