Собир на православни верници во Скопје: Поддршка за епископот Партениј како кандидат за митрополит

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Собир на православни верници во Скопје: Поддршка за епископот Партениј како кандидат за митрополит

31 мај 2025

• од Станча Јаќимовски

На плоштадот „Македонија“ во Скопје денеска се одржа мирен собир на православни верници кои побараа епископот Антаниски Партениј да биде вклучен како втор кандидат во изборот за нов митрополит на Дебарско-кичевската епархија. Присутните испратија порака до поглаварот на Македонската православна црква – Охридска архиепископија (МПЦ-ОА), архиепископот г.г. Стефан, изразувајќи го своето несогласување со предложениот единствен кандидат, јеромонах Георгиј.

Верниците, кои се нарекоа „жива црква“, потенцираа дека нивното барање не е протест, туку израз на духовна загриженост и иницијатива да се слушне и гласот на народот. Тие порачаа дека бараат праведност и духовна логика во процесот на избор, а не формалност.

„Ние овојпат имаме наш кандидат, кој ги освои срцата на илјадници духовни чеда – тоа е отец Партениј. Бараме да има втор кандидат. Во никој случај не сме против новоназначениот монах, кому му посакуваме долг и благодетен живот, но сакаме да биде слушнат и гласот на верниците“, рече еден од организаторите на собирот, Илија Ико Каров.

Сличен собир се одржа и вчера во Охрид, каде група верници, движејќи се низ центарот на градот, извикуваа „Достоен“ во знак на поддршка за епископот Партениј. Тие изразија уверување дека тој е најдостоен за духовниот престол во епархијата.

Во изјава за медиумите, верникот Благој Веселинов истакна: „Овде сме за да му дадеме поддршка на нашиот дедо Партениј. Ваквото свештенство денес е компетентно да зборува за духовност исто како некој што прочитал прирачник за тоа како се вози велосипед, а никогаш не возел.“

Инаку, архиепископот г.г. Стефан неодамна го предложи новоименуваниот јеромонах Георгиј (поранешен амбасадор во Ватикан и декан на Богословскиот факултет, Ѓоко Ѓоргевски) за митрополит на Дебарско-кичевската епархија, а неговиот предлог е веќе доставен до членовите на Синодот. Седницата за избор на нов митрополит е закажана за 12 јуни.

Верниците најавија дека ќе продолжат со своите активности и апели до Синодот, надевајќи се дека процесот ќе биде отворен и дека ќе биде дадена можност и на други кандидати, особено на епископот Партениј, кој, според нив, долго време несебично служи на духовниот развој на народот во регионот.