24 август 2025
• од Станча Јаќимовски
Министерството за здравство во понеделник ќе ја финализира листата на експерти кои ќе утврдуваат дали во приватните болници се вршеле непотребни хируршки интервенции врз пациенти. Ова го изјави министерот за здравство, Азир Алиу, за ТВ24.
Алиу потврди дека еден експерт ќе дојде од Словенија, друг од Италија, а за третиот изборот е меѓу Австрија и Германија. Според него, ангажирањето на странски специјалисти има цел да обезбеди поголема објективност и да се добие реална слика за состојбите во приватниот здравствен сектор.
Министерот најави дека приватните здравствени институции ќе бидат обврзани да ги отворат своите бази на податоци за следење на здравствената патека на секој пациент.
„Ова е право на државата, бидејќи секој граѓанин директно или индиректно придонесува кон здравствениот систем и кон Фондот. Затоа мора да бидеме во тек со здравствената патека на секој граѓанин во земјава,“ изјави Алиу, додавајќи дека комисијата веќе работи на отстранување на евентуални законски пречки.
Директорот на Фондот за здравство, Сашо Клековски, упати апел до пациентите кои сметаат дека биле оштетени со непотребни интервенции, особено во областа на кардиохирургијата, да поднесат жалби.
Овој повик следи по изјавата на кардиохирургот Сашко Кедев, кој пред неколку дена алармираше дека во дел од приватните болници се вршат интервенции без медицинска потреба, со цел остварување профит, меѓу кои и стентирања и операции.
Како одговор на овие обвинувања, Министерството за здравство најави формирање комисија составена од три странски експерти, која ќе ја провери практиката во приватните здравствени институции. Воедно, ќе продолжат и контролите во јавните болници кои работат во истата област.
Со оваа иницијатива, надлежните очекуваат да се обезбеди транспарентност, заштита на пациентите и враќање на довербата во здравствениот систем.
Ненадминливи Понуди Дневно
4.8 (10276 рецензии)
Заштедете 152.00 ден

