11 ноември 2025
• од Станча Јаќимовски
Студентите кои живеат во домот „Браќа Миладиновци“ во Штип повторно излегоа со јавна реакција за тешките услови во кои се наоѓаат. Според нив, ситуацијата станува сѐ понеподнослива, а потребата од итни подобрувања е повеќе од очигледна.
Како што пренесува студентската страница „Студентарија“, цел викенд на станарите им била сервирана само конзервирана храна — без топол оброк и без разновидност во исхраната. Тие добиле пакети составени од две паштети, две конзерви месен нарезок, еден кроасан и мало чоколадо, што им било единствена храна за двата дена од викендот.
„Овој пакет е предвиден како единствена храна за сабота и недела, што е апсолутно недоволно за млад човек кој студира и има потреба од здрава и хранлива исхрана,“ стои во објавата на „Студентарија“.
Покрај проблемите со исхраната, студентите посочуваат и на катастрофалните санитарни услови во домот. На 130 студенти им стојат на располагање само две туш кабини, што создава големи гужви и незадоволство. Тие велат дека хигиената е на многу ниско ниво, а редовното одржување речиси и не постои.
Во текот на работната недела, според нивните тврдења, оброците се повторуваат и се сиромашни со хранливи состојки. „Нема ни овошје, десерт ретко, а салата речиси никогаш,“ изјавуваат дел од студентите, нагласувајќи дека ваквата исхрана не ги исполнува ни минималните нутритивни стандарди.
Студентите бараат итна реакција од надлежните институции и обезбедување на минимални стандарди за живеење и студирање. Нивните барања вклучуваат подобра и поквалитетна исхрана, редовно одржување на санитарните простории и создавање функционални заеднички простории за учење.
„Ние не бараме луксуз, туку достоинствени услови за живот и студирање. Сакаме да се чувствуваме безбедно и почитувано во домот во кој живееме,“ порачуваат студентите.
Денес ја славиме Света Анастасија – жената што не се уплаши ни од меч ни од маки
Ненадминливи Понуди Дневно
4.8 (10276 рецензии)
Заштедете 152.00 ден

