Татко на жртва од „Пулс“: Од тој ден сум само физички жив, внатре сум мртов

Со скршени срца и непоколеблива решеност, родителите на загинатите во трагедијата во дискотеката „Пулс“ денеска по петти пат маршираа во „Маршот за ангелите“ во Кочани. Болката, гневот и чувството на неправда беа јасно искажани преку потресни зборови и апели за правда, кои одекнаа меѓу присутните и пошироката јавност.

„Од тој ден јас сум само физички жив, како фигура, а внатре сум мртов“, рече со солзи во очите татко на еден од младите чии животи беа згаснати во пожарот. „Како можете да објавите моја фотографија за ‘Татко на годината’ кога од 16 март веќе не сум татко и никогаш нема да бидам. Ми го убија единствениот син“, додаде тој, изразувајќи ја длабоката лична и човечка трагедија што ја преживува секој ден.

Родителите не ја кријат својата разочараност од институциите и бараат одговорност од надлежните. „Обвинители и судии, внимавајте како ќе судите. Бараме по една година затвор за секое мртво дете и половина година за секое повредено. Тоа се најмалку 115 години затвор – судете праведно“, порача огорчениот татко, најавувајќи дека ако не добијат правда, нема да останат само на мирни протести.

На протестот говореше и мајка чие дете го загуби животот во трагедијата, прашувајќи: „Кој им дозволи на демоните да ги убијат нашите ангели?“ Таа порача дека нема да прифатат тајни состаноци и дека бараат јавен одговор од министерот за внатрешни работи Тошковски и премиерот Мицкоски. „Кога ќе добиеме одговор, тогаш ќе бидеме смирени“, рече таа.

Родителите истакнаа дека очекуваат правична судска постапка, но ако институциите не донесат правда, ќе ја побараат на меѓународно ниво – во Европскиот суд за човекови права во Стразбур. Во таа борба, велат, ќе побараат поддршка од домашни и странски правни експерти и адвокати.

Трагедијата во „Пулс“ не е само лична болка за овие семејства – таа стана симбол на системскиот распад, на неодговорноста и на потребата за правда која се уште ја нема. Родителите порачаа: нема правда – нема мир.