„Титан-Усје“ ги негира обвинувањата за загадување на воздухот во Скопје

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

„Титан-Усје“ ги негира обвинувањата за загадување на воздухот во Скопје

21 декември 2025

• од Станча Јаќимовски

Скопската цементарница „Титан-Усје“ целосно ги отфрла обвинувањата дека нејзиното работење придонесува за загадувањето на воздухот во главниот град, наведувајќи дека компанијата работи согласно сите законски прописи и е под постојан надзор. Од таму тврдат дека ваквите обвинувања не се поткрепени со научни и мерливи факти.

Реакцијата на компанијата доаѓа по најавата на граѓанската иницијатива „Стоп за Усје“ за организирање блокада на раскрсницата меѓу булеварите „Борис Трајковски“ и „Србија“ во четврток, 25 декември. Од иницијативата најавија дека на протестот ќе бидат изнесени конкретни барања до надлежните институции за, како што велат, конечно и трајно решавање на проблемот со загадувањето на воздухот во Скопје, за кое ја посочуваат цементарницата како еден од главните причинители.

„За жал, и овој пат компанијата се користи како изговор, иако реалните, научни и мерливи факти јасно укажуваат дека причините за загадувањето треба да се бараат на друго место“, се наведува во соопштението на „Титан-Усје“.

Од компанијата информираат дека работењето на цементарницата е под 24-часовен независен мониторинг и дека сите податоци од мерењата се јавно достапни. Истите, како што велат, редовно се доставуваат до надлежните институции, кои имаат и независен увид, а се споделуваат и со медиумите и граѓанскиот сектор.

Според „Титан-Усје“, сите досегашни мерења покажуваат дека емисиите на штетни честички се под законски дозволените граници. Како дополнителен аргумент, од компанијата наведуваат дека последното контролно мерење било спроведено на 18 декември 2025 година од страна на Државниот инспекторат за животна средина, при што не биле утврдени никакви отстапувања од пропишаните лимити.

Цементарницата нагласува дека работи согласно А-еколошката дозвола, која е под постојан надзор од Министерството за животна средина и просторно планирање и во која детално се дефинирани сите параметри за заштита на животната средина.

„Поврзувањето на нашата компанија со квалитетот на воздухот е неосновано и паушално и се базира на претпоставени вредности од софтверски апликации кои не користат верификувани методи за мерење и не можат да се сметаат за релевантен извор, ниту во нашата земја, ниту во Европската Унија“, стои во соопштението.

Од „Титан-Усје“ додаваат дека ќе продолжат да работат транспарентно и одговорно, почитувајќи ги сите законски норми.

Од друга страна, од иницијативата „Стоп за Усје“ порачуваат дека протестот е мирен, но решителен одговор на, како што велат, долгогодишното континуирано труење на скопјани со знаење и толеранција од страна на институциите.

„Наместо заштита на јавното здравје, сведоци сме на системско игнорирање на алармантните податоци, недејствување и прикривање на одговорноста“, наведуваат од иницијативата, додавајќи дека повеќе нема да дозволат здравјето на граѓаните да се жртвува на сметка на профитот.