Трајчулески: Власта мора јавно да ги обелодени сите детали за најавеното задолжување од 6 милијарди евра

Пратеникот на СДСМ, Митко Трајчулески, во интервју за вестите на телевизија „Сител“, побара транспарентност од владата во однос на најавеното задолжување од 6 милијарди евра од Велика Британија, укажувајќи дека јавноста мора да биде целосно информирана за сите аспекти од финансиската страна на стратешкиот договор.

Трајчулески потенцираше дека СДСМ дава целосна поддршка на политичко-безбедносниот дел од стратешкото партнерство со Обединетото Кралство, кое има традиција уште од 1991 година. Сепак, тој изрази сериозна загриженост поради недостигот на информации за финансиските услови на заемот кој, според него, е еквивалентен на целиот државен буџет.

„Сè уште не се знае колкава е каматната стапка, која е рочноста, дали и колку ќе се зголеми јавниот долг. Дополнително, од изјавите на министерката за финансии се добива впечаток дека со договорот се дерогира Законот за јавни набавки, бидејќи се наметнува обврска фирмите да бидат британски. Тоа ги нарушува основните принципи на фер, конкурентност и транспарентност“, истакна Трајчулески.

Пратеникот изрази и сомнеж во капацитетите на владата за реализација на големи инфраструктурни проекти, потсетувајќи дека претходните средства, како оние од Унгарија во износ од 78 милиони евра, останале нереализирани.

„Во завршната сметка на буџетот за 2024 година е јасно дека реализацијата на овие средства е 0%. Податоците за капиталните инвестиции за првиот квартал се исто така загрижувачки. Ова фрла сомнеж врз способноста на владата да управува со вакви капитални инвестиции“, додаде тој.

Во однос на безбедносниот аспект, Трајчулески посочи дека премиерот мора да излезе со јасна позиција по написите во британските медиуми, кои отворија дилема околу можноста Северна Македонија да прифати баратели на азил и мигранти како дел од договорот.

„ВМРО-ДПМНЕ, додека беше опозиција, ширеше страв и хистерија околу наводно населување на милион бегалци. Сега, кога се на власт, имаат уште поголема обврска да ги расчистат сите дилеми и да дадат цврсти гаранции дека ова прашање не е дел од договорот“, нагласи Трајчулески.

Тој заклучи дека Владата мора да ја врати довербата кај граѓаните преку транспарентност и отчетност, особено кога станува збор за крупни финансиски одлуки кои можат да имаат долгорочни последици за економијата и државниот буџет.