Трендафилов предупредува: 6000 денари повеќе или масовни протести

Слободан Трендафилов, повторно ја потврди решителноста на синдикатот во борбата за подобри работнички права. При денешната посета на Прилеп, каде што ССМ даде поддршка на вработените во Терминалот кои протестираа, Трендафилов нагласи дека нема отстапување од барањето за зголемување на минималната плата за 6000 денари, како и за пораст на сите плати во земјава.

„Не се откажуваме од нашето барање – повисока плата за работниците е основа за достоинствен живот. Ако нема слух, ќе излеземе на улица и овој пат ќе повикаме и работниците со нас“, порача Трендафилов, упатувајќи апел до Владата да седне на преговарачка маса.

ССМ, според него, нуди фер и одмерени решенија – подадена рака и кон работодавачите и кон Владата. Предлогот на ССМ предвидува зголемувањето на минималната плата да се реализира во неколку фази:

1. Субвенционирање на придонесите – Владата, преку пренамена на средства од буџетот, да ги уплати придонесите во име на работниците во Фондот за ПИОМ, за износот од 6000 денари.
2. Одложено плаќање на придонеси – Работодавачите да добијат рок од 12 месеци за уплата на придонесите на зголемената плата, што би им овозможило организациска и финансиска стабилност.
3. Целосна уплата на придонеси – Работодавачите да ги плаќаат придонесите на новата, покачена основа од 500 евра.

„Голем дел од работодавачите ги прифатија нашите предлози, па дури и сами предлагаат замрзнување на придонесите со цел да ги зголемат платите. Но, за жал, Владата одлучи еднострано, без мислење од Економско-социјалниот совет, да ја утврди минималната плата на ниво кое не е доволно за достоинствен живот,“ изјави Трендафилов.

Синдикатот останува цврст во својата позиција и најавува дека нема да се поколеба сè додека не се исполнат барањата за повисоки плати. ССМ испраќа јасна порака – времето на игнорирање на гласот на работниците е минато, а улицата ќе биде последна опција ако дијалогот изостане.