Третина од домаќинствата во Северна Македонија живеат во трисобни станови, над 70% се греат на цврсти горива

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Третина од домаќинствата во Северна Македонија живеат во трисобни станови, над 70% се греат на цврсти горива

30 декември 2025

• од Станча Јаќимовски

Речиси една третина од домаќинствата во Република Северна Македонија живеат во трисобен стан со површина меѓу 51 и 70 квадратни метри, покажуваат податоците од „Статистичкиот годишник на Република Северна Македонија 2025“ на Државниот завод за статистика.

Според статистиката, најголем дел од домаќинствата – 36,3 проценти – живеат во трисобен стан, 28,6 проценти во четирисобен или поголем, додека 26,4 проценти живеат во двособен стан. Во еднособен стан или гарсоњера живеат 4,5 проценти од домаќинствата.

Голем дел живеат во сопствен дом

Над 92,7 проценти од домаќинствата живеат во сопствен стан или куќа, 5,1 процент живеат кај родители, деца или други роднини, додека само 2 проценти живеат во изнајмен стан. Во однос на квадратурата, 32 проценти користат стан меѓу 51 и 70 метри квадратни, над 26 проценти живеат во станови од 81 до 100 квадратни метри, а 14,5 проценти во станови поголеми од 100 квадрати.

Греењето и понатаму најчесто на цврсти горива

Податоците покажуваат дека греењето останува еден од најголемите предизвици. Над 71 процент од домаќинствата се греат на цврсти горива, додека 20,7 проценти користат електрична енергија. Само 5 проценти имаат сопствено парно греење, а 2,9 проценти се приклучени на централно парно. Централно парно греење имаат вкупно само 15,3 проценти од домаќинствата.

Опременост со трајни добра

Во однос на трајните добра, над 97 проценти од домаќинствата имаат електричен шпорет, бојлер, фрижидер, машина за перење алишта, пегла и телевизор. Правосмукалка имаат 93 проценти, а клима-уред 66,7 проценти. Фрижидер за длабоко замрзнување поседуваат 58,7 проценти, а машина за миење садови 40,6 проценти од домаќинствата. Радио имаат 28 проценти, додека фотоапарат само 13,7 проценти.

Автомобил имаат две третини од домаќинствата

Патнички автомобил поседуваат 67,8 проценти од домаќинствата, велосипед имаат 40 проценти, а мотор само 7,7 проценти. Мобилен телефон имаат над 92 проценти од домаќинствата, додека фиксен телефон користат само 22 проценти. Персонален компјутер поврзан на интернет имаат 46,5 проценти од домаќинствата.

Демографска структура и приходи

Просечниот број на членови во едно домаќинство изнесува 3,05. Во работен однос во просек биле 1,13 членови, додека 1,15 членови биле издржувани. Со лични приходи биле 0,67 членови, самовработени 0,03, а активни земјоделци 0,07 членови по домаќинство.

Истражување спроведено на над 5.000 домаќинства

Податоците се добиени врз основа на статистичкото истражување „Анкета за потрошувачката на домаќинствата“, спроведено во текот на 2024 година на примерок од 5.040 домаќинства. Анкетирани биле 2.914 семејства, а бројот на оценети семејства изнесува 598.632, од кои 92,7 проценти се неземјоделски, 5,2 проценти мешовити, а само 2 проценти земјоделски домаќинства.