Туфегџиќ алармира: Гневот на семејствата од Кочани може да ескалира

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Туфегџиќ алармира: Гневот на семејствата од Кочани може да ескалира

27 април 2025

• од Вардарски

Адвокатот и поранешен судија Владимир Туфегџиќ предупредува дека очајот и гневот кај семејствата на настраданите во трагедијата во Кочани може многу лесно да ескалира, со што ситуацијата може да излезе од контрола.

Туфегџиќ истакнува дека институциите мора итно да преземат активности и да им ја објаснат реалноста на семејствата за судската постапка, очекувањата и можните исходи. Според него, постапката со 68 осомничени е комплицирана и носи голем број предизвици.

„Протестите на семејствата на настраданите говорат за длабок очај и гнев. На овие луѓе им е потребна стручна институционална помош. Потребно е веднаш да се мобилизираат организации што работат со жртви од вакви трагедии, ако воопшто постојат такви во земјава. Јавното обвинителство и полицијата мораат да ја кажат вистината за реалните можности на постапката и исходот, за да не се создава лажна надеж“, нагласи Туфегџиќ.

Тој додаде дека оштетените се странка во постапката и дека државните органи имаат обврска кон нив да постапуваат транспарентно.

„Од секогаш сум бил поборник веднаш да се каже вистината, колку и да е болна. Подобро е уште сега на семејствата да им се објасни дека постапка со 68 осомничени за кривично дело 'Тешки дела против општата сигурност' е сама по себе проблематична. Пожарот и неговите последици се една работа, додека институционалните пропусти и легалноста на објектот од 2012 година наваму се сосема друга правна приказна“, посочи адвокатот.

Туфегџиќ предупредува дека во судска постапка со толку многу обвинети може да се појават илјадници проблеми и дека секој од обвинетите има право да се брани со сите законски средства.

„Подобро е оштетените сега да ја слушнат вистината, отколку догодина да излезат на протести барајќи брза правда, а институциите да си ја префрлаат топката меѓу себе – од полицијата, до обвинителството и судот. Тогаш ќе биде предоцна“, заклучува Туфегџиќ.