26 септември 2025
• од Станча Јаќимовски
Училиштата кои не нарачале доволно учебници ќе бидат казнети со обврска сами да ги отпечатат недостасувачките примероци и да им ги достават на родителите. Ова го најави министерката за образование и наука, Весна Јаневска, во вечерашното гостување во емисијата „Вин-вин“ на телевизија „Телма“.
„Факт е дека дел од училиштата не го нарачаа соодветниот број на учебници. Сега казната за нив е што треба да ги отпечатат учебниците и да им ги дадат на родителите“, истакна Јаневска.
Министерката нагласи дека процесот на нарачка на учебници се одвивал бавно и отежнато. Според неа, и покрај тоа што на училиштата им било укажано навремено да ги обезбедат потребните примероци, дел од нив не ја исполниле обврската.
„Видовме дека бавно и тешко оди процесот. На училиштата им рековме да нарачаат учебници, но сепак дел од нив не го нарачаа потребниот број“, рече таа.
Јаневска посочи дека дел од родителите веќе не чекаат училиштата, туку на сопствен трошок ги печатат учебниците за своите деца.
„Некоја пракса е дека родителите тоа и самите го прават и не ги чекаат училиштата да им ги испечатат учебниците“, додаде министерката.
Дополнително, таа потсети дека издавачките куќи имаат право до 10 проценти од учебниците да ги понудат во слободна продажба. Притоа, цената е иста со онаа што Министерството за образование и наука (МОН) ја има утврдено при откупот.
Со оваа мерка се обезбедува и дополнителна можност за родителите кои не можат да ги добијат учебниците преку училиштата, да ги набават самостојно.
Ненадминливи Понуди Дневно
4.8 (10276 рецензии)
Заштедете 152.00 ден

