Условна казна за напаѓачот на „Инфомакс“: Судот предупреди на сериозна закана по слободата на говорот

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Условна казна за напаѓачот на „Инфомакс“: Судот предупреди на сериозна закана по слободата на говорот

30 декември 2025

• од Станча Јаќимовски

Основниот кривичен суд во Скопје изрече условна казна затвор за упадот и насилството во просториите на редакцијата на „Инфомакс“, оценувајќи дека со настанот биле директно загрозени безбедноста на новинарите, слободата на изразување и правото на јавноста да биде информирана.

Обвинетиот Горан Спасов од Скопје е прогласен за виновен за кривичните дела насилство и спречување службено лице во вршење службено дејствие. Судот му изрече условна казна затвор од две години, која нема да се изврши доколку во следните пет години не стори ново кривично дело.

Покрај условната осуда, на Спасов му е изречен и заштитен надзор во траење од четири години. Во рамките на оваа мерка, тој е задолжен да се подложи на лекување или социјална рехабилитација во соодветна специјализирана установа. Судот предупреди дека доколку не ги почитува утврдените обврски, условната казна ќе биде активирана и ќе следи издржување затвор.

За време на судската расправа, обвинетиот целосно ги призна делата што му се ставаа на товар, упати јавно извинување до новинарите кои беа оштетени од настанот и присуствуваа во судницата, и изрази каење за стореното.

При одмерувањето на казната, судот нагласи дека ваквите дела сериозно го нарушуваат јавниот ред и го загрозуваат чувството на сигурност кај граѓаните, а во конкретниот случај дополнително била доведена во прашање и безбедноста на медиумските работници.

Во образложението на пресудата, судот посочи дека спречувањето на новинарите во извршувањето на нивната професионална должност не претставува напад само врз поединци, туку и врз правото на целата јавност да биде навремено, точно и објективно информирана.

„Станува збор за сериозен напад врз јавниот интерес, слободата на говорот и демократскиот поредок“, се наведува во судската оценка.

Како олеснителни околности, судот ги земал предвид личните и семејните прилики на обвинетиот, фактот дека досега не бил осудуван, како и неговата здравствена состојба. Според наодот на судскиот вештак – психијатар, Спасов боледува од шизотипно растројство, кое влијае врз контролата на импулсите и бара континуирана медицинска терапија.

Судот оцени дека со изречената условна осуда, заштитниот надзор и задолжителното лекување ќе се постигнат целите на казнувањето – превенција, ресоцијализација и заштита на јавниот интерес, со јасна порака дека насилството врз новинари и медиуми нема да биде толерирано.