Вработените во Зоолошката градина си ја бараат платата: без здравствено осигурување и без средства за живот

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Вработените во Зоолошката градина си ја бараат платата: без здравствено осигурување и без средства за живот

02 мај 2025

• од Вардарски

Вработените во Зоолошката градина во Скопје излегоа на протест, барајќи ги своите плати за изминатите два месеци. Тие посочуваат дека веќе 45 дена немаат примено плата, што за нив е преседан, бидејќи досега никогаш не се случило толку долго да останат без примања.

„Овој протест е за да нѐ видат дека немаме земено плата за март месец. Вчера изгубивме и здравствено, бидејќи немаме плата на време. Имаме и колеги кои се на боледување. Кај без плата, па и без здравство“, изјави Миле Таневски, претседател на синдикалната организација на ЗОО-Скопје. Тој нагласи дека доколку не се подмират долговите кон вработените, ќе се соочат со камати, извршители и други последици. „Телефоните ни ги исклучија. Велигден го пројдовме без плата, 1 Мај го поминавме без пари“, додаде Таневски.

Проблемот не е само во платите. Зоо-негователот Мирослав Станковиќ порача дека Зоолошката градина има сериозен недостиг на кадар и апелираше да се донесат помлади работници. „Ние секојдневно сме склони на повреди, а еве веќе немаме ниту здравствено. Зоолошка градина подолго време е арена за политички пресметки. Нас тоа не нѐ интересира. Апелираме да ни се реши статусот“, рече Станковиќ.

Од Синдикатот за образование, наука и култура (СОНК), претседателот Јаким Неделков истакна дека состојбата е неприфатлива. „Трпението е при крај. Со бирани зборови ја кажуваат нивната мака, нивната тага. Но факт е дека денеска немаат ни здравствено осигурување. Секојдневно се изложени на повреди, а да останат без здравствено е нехумано“, рече Неделков.

Неделков изрази разочарување што директорот на Зоолошката градина не бил на работа во моментот кога сакал да се сретне со него, и порача дека според хиерархијата, директорот е одговорен за исплата на платите. Според него, проблемот се проширува и на вработените во Град Скопје, кои исто така не примиле плата.

Доколку ситуацијата не се реши наскоро, вработените предупредуваат дека Зоолошката градина може да се соочи со затворање на вратите. Останува да се види дали надлежните институции ќе постапат навреме за да им обезбедат на работниците она што го заслужуваат – заработената плата и основното право на здравствена заштита.