Заклучена фабрика: Газдите од „Елит фешн“ исчезнаа, вработените без плата и К-15

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Заклучена фабрика: Газдите од „Елит фешн“ исчезнаа, вработените без плата и К-15

18 август 2025

• од Станча Јаќимовски

Утрово, по завршениот одмор, вработените во текстилната компанија „Елит фешн“ од Штип ја најдоа фабриката заклучена. Работниците велат дека двајцата сопственици – еден од Германија и еден од Хрватска – без никакво известување ја затвориле фирмата и заминале, оставајќи ги без плата и без законскиот надомест К-15.

Очај и гнев кај вработените

„Не оставија на улица и побегнаа. Срамота е ова што го прават. Работевме 27 дена минатиот месец, ни должат плата и награда, а наместо тоа не заклучија. На 40 степени работевме, апчиња пиевме за да издржиме и да ги истераме налозите, а тие не ни дадоа ништо. Ако веќе затвораат, нека ни ги исплатат парите и нека дозволат барем да си ги земеме нашите лични работи“, велат дел од револтираните работници кои утрово протестираа пред фабриката.

17 години работа – крај со клуч на врата

„Елит фешн“ функционираше повеќе од 17 години, а објектот во кој работеше беше под наем. Според активистката за труднички права, Крстана Ампева, проблемот е што станува збор за странски сопственици, поради што институциите немаат механизми за ефективна контрола.

„Инспекцијата беше известена уште минатата недела. Работниците формално се водат на определено, иако многумина работат со години и требаше договорите да им бидат трансформирани во неопределено. Тоа отвора прашања и за отпремнини и за евентуални прекршувања на законот“, вели Ампева за Канал 77.

Таа додава дека низ годините имало пријави и за манипулации со исплатата на К-15, каде работниците добивале симболични износи од 1.000 или 2.000 денари, но биле принудени да потпишат спогодби.

Писмо наместо одговорност

Минатата недела газдите испратиле писмо до вработените во кое наведуваат дека поради намалени нарачки производството престанува, а работниците ќе бидат одјавени. Во дописот стои и дека немаат средства за исплата на платите и сметките, но ќе ги информираат дополнително кога ќе можат да исплатат.

„Овие фирми така завршуваат – ќе заклучат и никому ништо. Во Германија веднаш би ги пронашле газдите, но кај нас нема механизам. Работниците зборуваат дури кога ќе останат на улица, а тогаш е предоцна“, предупредува Ампева.

Судбина неизвесна

Вработените велат дека ќе бараат институциите да интервенираат и да им бидат исплатени заостанатите плати и К-15. „Ние имаме фамилии и трошоци, не бараме ништо повеќе од она што сме го заработиле“, велат тие.

Случајот со „Елит фешн“ уште еднаш ја отвора темата за експлоатацијата на работниците во текстилната индустрија, особено од страна на странски инвеститори кои со години профитираат, а потоа без одговорност ја затвораат вратата зад себе.