Железничкиот сообраќај повторно во застој: персоналот во бојкот поради неисплатена плата

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Железничкиот сообраќај повторно во застој: персоналот во бојкот поради неисплатена плата

02 јануари 2026

• од Станча Јаќимовски

Железничкиот сообраќај во земјава повторно е сериозно нарушен откако поголемиот дел од машинскиот и извршниот персонал во МЖ Транспорт стапи во бојкот поради неисплатен втор дел од платата за ноември и неисполнети барања од претходниот протест.

Поради бојкотот, патничкиот железнички сообраќај е речиси целосно во прекин, додека товарниот сообраќај се одвива делумно. Од синдикатот најавуваат дека возовите нема да сообраќаат сè додека не бидат повикани на преговори и не добијат писмена гаранција за исполнување на нивните барања.

Претседателот на Синдикалната организација на машиновозачите на Македонија и претставник на машинскиот и извршниот персонал во МЖ Транспорт, Тони Димовски, за МИА изјави дека бојкотот започнал вчера, откако и покрај претходно постигнат договор со раководството, не бил исплатен вториот дел од ноемвриската плата, ниту пак биле исполнети договорените услови.

– На 18 декември ни беше исплатен само првиот дел од платата. Имаме неофицијални информации дека вториот дел можеби ќе биде исплатен денеска, но бојкотот ќе продолжи сè додека не бидеме повикани на преговори и додека не добиеме писмен документ дека нашите барања ќе бидат исполнети – истакна Димовски.

Според него, во бојкот се вклучени меѓу 60 и 70 проценти од машинскиот и извршниот персонал, поради што не сообраќаат поголемиот дел од возовите.

– Од патничките возови вчера сообраќаше само еден, на релација Скопје–Гевгелија во 16:55 часот. Возовите на релациите Скопје–Куманово, Скопје–Битола, Скопје–Велес, како и утринскиот воз Скопје–Гевгелија, не тргнаа – изјави Димовски.

Тој потсети дека на 1 декември минатата година железничкиот сообраќај беше целосно прекинат, а се нормализираше на 2 декември по средба меѓу претставниците на персоналот, раководството на МЖ Транспорт и Министерството за транспорт.

Синдикатот уште на 2 октомври доставил 15 барања до раководството, меѓу кои исплата на прекувремени часови, бонус плата за над 150 прекувремени часови, зголемување на коефициентот за 0,80 поради пораст на животните трошоци, како и додаток од 10 проценти на платата за вонредно повикување на работа. Според Димовски, и покрај договорот, ниту едно од овие барања досега не е исполнето.

Од синдикатот порачуваат дека се отворени за дијалог, но без конкретни гаранции, железницата ќе остане во застој.