Зијадин Села: Средбите меѓу Ахмети и Таравари не се спорни, време е за обединување на албанскиот политички блок

Лидерот на Алијанса за Албанците, Зијадин Села, денеска порача дека нема ништо спорно во средбите меѓу Али Ахмети и Арбен Таравари, истакнувајќи дека во сегашниот политички момент најважно е обединување на албанскиот политички фактор.

„Никој, па ни јас, нема право да одредува со кого ќе се сретне еден претседател на партија. Информиран сум дека имало две или три средби меѓу Ахмети и Таравари, но во тоа нема ништо лошо,“ рече Села, по своето обраќање по повод годишнината од настаните на 27 април.

Одговарајќи на прашања околу можното коалицирање на Алијанса за Албанците во рамките на Европскиот фронт, Села порача дека конечен став ќе биде донесен кога прашањето ќе биде формално поставено на разгледување.

„Лошо е да се гради политичка кариера на оцени за други. Треба да имаш храброст да се соочиш, а не да бегаш. Нашиот став ќе го кажеме кога ќе биде време за тоа,“ додаде тој.

Села остро реагираше и на случувањата поврзани со правата на Албанците, предупредувајќи дека сега е клучно обединување на сите албански партии.

„Кога ни го укинуваат правото на јазик и на правична застапеност, мораме да се обединиме – и Таравари, и Меџити, и Гаши, и Касами. Ова го кажував уште во првите сто дена од оваа Влада. Само обединети можеме да се спротивставиме на овие процеси,“ нагласи Села.

Тој истакна и дека секој закон донесен со Бадентеров принцип мора да се гласа на ист начин и во Уставниот суд, како дел од неопходните уставни промени за деблокирање на евроинтеграциите.

На прашањето за можноста за повторно обединување со фракцијата на Таравари, Села беше категоричен:

„Не знам во кој дом и која врата ќе не вдоми Таравари, бидејќи таа врата и тој дом се мои. Тој нема ни врата, ни дом. Неморално е пред граѓаните да се правиме дека ништо не се случило,“ истакна Села.

На крајот, тој упати повик до поранешното членство на Алијанса за Албанците:

„Ги повикувам сите да се вратат таму каде што им е местото. Алијансата мора да продолжи да гради, а не да дели. За тоа е потребно јавно извинување и политичка одговорност од оние кои ја напуштија и ја оштетија партијата,“ заврши Села.